Hornfirðingar heita því að draga úr losun gróðurhúsalofttegunda

Björn Ingi Jónsson, bæjarstjóri Hornafjarðar, og Guðmundur Ingi Guðbrandsson, framkvæmdastjóri Landverndar, skrifuðu í síðustu viku undir yfirlýsingu um samdrátt sveitarfélagsins í útlosun mengunarefna.

Sveitarfélagið Hornafjörður er þar með fyrsta sveitarfélagið á Íslandi sem hefur þátttöku í loftslagsverkefni Landverndar „Tækifærin liggja í loftinu“.

Björn Ingi segir að með yfirlýsingunni ábyrgist sveitarfélagið við að vinna ötullega að því að draga úr losun gróðurhúsalofttegunda í starfsemi sinni og hvetja jafnframt fyrirtæki og íbúa til hins sama“.

Í tilkynningu frá Landvernd segir að fyrir sveitarfélagið Hornafjörð séu loftslagsbreytingar mjög áþreifanlegar. „Jöklar hopa, landris veldur vandamálum við innsiglinguna á Höfn, og súrnun sjávar er líkleg til að hafa neikvæð áhrif á lífríki sjávar í framtíðinni, en sjávarútvegur er stór atvinnuvegur á svæðinu.

Á síðustu tveimur og hálfu ári hafa sveitarfélagið og Landvernd unnið í sameiningu að því að mæla útlosun gróðurhúsalofttegunda frá starfsemi sveitarfélagsins sem einingar og setja sveitarfélaginu markmið og vinna aðgerðaáætlun um samdrátt í útlosun.

„Verkefnið á sér fyrirmynd hjá dönsku náttúruverndarsamtökunum, en um 75% sveitarfélaga í Danmörku taka þátt í verkefni þeirra. Við stefnum því auðvitað á að fá fleiri sveitarfélög inn í verkefnið og hefur Fljótsdalshérað þegar hafið undirbúningsvinnu“, segir Rannveig Magnúsdóttir verkefnisstjóri hjá Landvernd.

Á næstu tveimur árum stefnir Hornafjörður að að minnsta kosti þriggja prósenta samdrætti á ári í útlosun gróðurhúsalofttegunda frá samgöngum, orkunotkun og úrgangi. Stefnt er að frekari samdrætti eftir endurskoðun aðgerðaáætlunar árið 2018.