„Við erum alvöru afl“

Í dag dreifði Ronja, nýstofnað feministafélag Hagaskóla, túrtöppum og dömubindum á öll almenningsklósett skólans.  Uppátækið er hluti af kynningarviku félagsins innan skólans um hvað það er og þýðir fyrir stelpur að vera á túr.

Hugmyndin um frí dömubindi og túrtappa á almenningsklósettum hefur nú þegar hlotið töluverða athygli utan veggja skólans. Una Torfadóttir og formaður Ronju, Margrét Snorradóttir, skoruðu í gær á borgina að gera slíkt hið sama fyrir öll almenningsklósett.

Það sat ekki á svörum úr Ráðhúsinu því strax í gær tjáði Sóley Tómasdóttir, fulltrúi Vinstri Grænna í borgarstjórn, um málið á Fésbókarsíðu sinni; „Frábært framtak og fullkomlega sjálfsögð og eðlileg krafa. Reykjavíkurráð ungmenna lagði þetta til á fundi með borgarstjórn í vor og málið er komið í skoðun hjá innkauparáði borgarinnar. Vonandi komum við þessu í framkvæmd áður en Una og félagar hennar útskrifast“.

Nærbuxur næst?

En ekki voru allir jafn hrifnir af hugmyndinni eins og sást á athugasemdakerfi Vísis í gær eftir að fréttin birtist en þar varð heilmikil umræða. Nokkrir karlmenn fóru afar ófögrum orðum um unglingsstúlkurnar tvær en flestir virtust þó styðja átakið. Aðrir köstuðu fram, á kurteisislegri hátt, þeirri spurningu hvort hreinlætisvörur fyrir blæðingar kvenna væri eitthvað sem yfirvöld ættu yfir höfuð að vera að greiða fyrir?

„Mér finnst í fyrsta lagi frábært hvað er að verða til mikil umræða,“ segir Una. „Það að fólki finnist í lagi að tala svona um okkur, tvær 15 ára stelpur, segir okkur bara að fólk er að gera sér grein fyrir því að við erum að gera alvöru hluti. Það sér að við erum alvöru afl. Þetta er ekki bara eitthvað krúttlegt djók hjá tveimur unglingsstelpum“.

Einn lesandi Vísis svaraði greininni með því að spyrja hvað kæmi næst? Ætti borgin þá líka að fara kaupa hreinar nærbuxur handa stelpunum?

„Alltaf þegar maður sér svona komment frá körlum og setur orðið „klósettpappír“ í stað dömubinda, þá sjá allir hversu ótrúlega heimskulegt þetta er. Hver sem er getur mætt með sinn klósettpappír í skólann en samt býður borgin upp á hann á almenningsklósettum. Enginn biður borgina um að skaffa klósettpappír fyrir öll heimili en við krefjumst þess að hann sé aðgengilegur á almenningsstöðum. Við erum bara að benda á að það sé rosalega skrítið að þetta sé eins með dömubindi og túrtappa líka og erum að biðja þau um að redda því bara!“

Una og Margrét tóku báðar þátt í siguratriði Skrekks í fyrra sem vakti töluverða athygli. Atriðið var beinskeytt ljóð eftir Unu ásamt hóp dansara sem túlkuðu það. Eftir það upplifðu stúlkurnar örlítið mótlæti en ekkert í líkindum við það sem þær sjá nú á umræðukerfi Vísis eftir að þær hrintu Túrvæðingunni í gang.

„Ég hef alltaf litið á þetta þannig að þegar manni er mætt með hörku, þá veit maður að það þýðir að maður er að gera eitthvað af alvöru,“ segir Una. „Því ef feðraveldið er til í að sitja bara og fylgjast með manni dúlla sér þá er maður ekki að gera nóg. Um leið og maður finnur að maður er að byrja að ógna og ögra þá hlýtur maður að vera gera eitthvað rétt því þá er maður að koma hreyfingu á umræðuna“.

Hér má sjá siguratriði Skrekks í fyrra.