Um háskólamenntun í tónlist – gæði náms, uppbygging og framþróun

Ég hef í nokkrum greinum hér í Fréttablaðinu vakið athygli á uppbyggingu og framþróun á sviði tónlistarmenntunar á Íslandi með áherslu á það starf sem á sér stað innan Listaháskóla Íslands á þeim sviðum þar sem ég hef kynnst starfinu af eigin raun.

Innan tónlistardeildar LHÍ fer einnig fram mikið starf sem ég hef ekki komið inn á í skrifum mínum og vert væri að fjalla um. Það er mikilvægt fyrir tónlistarlífið í landinu að vel sé búið að háskólamenntun á sviði tónlistar. Ennfremur er nauðsynlegt að tónlistarskólar sem sinna menntun á framhaldsstigi fái greitt úr þeim málum er snúa að fjármögnun námsins svo að tryggja megi fjölbreytt námsframboð og jafnrétti til náms.

LHÍ er ekki hafinn yfir gagnrýni, langt í frá. Skólinn er ungur og námið í stöðugri þróun. Á þeim skamma tíma sem skólinn hefur starfað hefur hann orðið einn helsti styrkleiki tónlistarlífsins á Íslandi. Fjölmargir nemendur skólans hafa fundið sér farveg á sviði tónlistar og þroskast og dafnað sem sjálfstæðir listamenn.

Þrátt fyrir aðstöðuleysi og fjárskort hef ég orðið vör við mikinn metnað stjórnenda um að námið þar sé framsækið og kröftugt, miði að þörfum nemenda og standist alþjóðlegar kröfur um gæði náms.

Listaháskólinn sinnir kerfisbundnu eftirliti með gæðum kennslu og rannsókna á grundvelli innra mats og eftir forskrift gæðaráðs háskólanna. Óháð úttekt var gerð á tónlistardeild LHÍ árið 2012 á vegum AEC (evrópskra samtaka tónlistarháskóla).

Undraverður árangur

Í niðurstöðum úttektarinnar kemur fram að nefndin telur að tónlistardeild LHÍ hafi náð undraverðum árangri á skömmum tíma, gæði kennslunnar séu mikil og námið framsækið. Námið miði að þörfum nemenda og sýni sú staðreynd hversu stór prósenta þeirra fá atvinnu að námi loknu, að námið búi nemendur vel undir atvinnumennsku í tónlist. Í skýrslunni er vitaskuld komið inn á aðstöðuleysi og fjárskort en Tónlistardeild LHÍ er jafnframt hrósað fyrir útsjónarsemi og þegar kemur að nýtingu á rými og fjármunum. Þar koma einnig fram ábendingar um það hvernig þróa megi starf tónlistardeildar LHÍ. Síðan skýrslan kom út hefur verið unnið markvisst í að fylgja þeim ábendingum eftir.

Sem dæmi um uppbyggingu náms innan LHÍ hef ég í greinarskrifum undanfarið fjallað um: námsþróun innan LHÍ í alþjóðlegri samvinnu, framsækið nám í söng og menntun tónlistarkennara.

Fjölbreytt uppbygging á sér stað innan tónlistardeildar, og margt sem ég hef ekki komið inn á í skrifum mínum s.s. öflugt nám í tónsmíðum og eflingu rannsókna.

Nauðsynlegt er að bæta aðstöðu LHÍ svo áfram verði hægt að hlúa að þeim vaxandi fjölda nemenda sem þangað sækir, sinna rannsóknum og þróa framsækið og kröftugt nám.