Um níutíu eldri borgarar fastir á spítala

Mikil eftirspurn er eftir hjúkrunarrýmum og öryggis- og þjónustuíbúðum fyrir eldra fólk. Byggja þarf um 1.500 ný rými á næstu tíu árum til að útrýma fjölbýlum og biðlistum. Um níutíu eldri borgarar eru vistaðir á Landspítalanum og ekki hægt að útskrifa þá vegna þess að engin laus pláss eru fyrir þá á hjúkrunarheimili.

Anna Birna Jensdóttir er hjúkrunarforstjóri Sóltúns. Hún gagnrýnir ríkið fyrir hægagang í uppbyggingu hjúkrunarrýma og segir þurfa að hugsa þjónustu fyrir eldri borgara upp á nýtt.

„Fólki finnst erfitt þegar tekjurnar eru teknar af því. Það gerist við flutning á hjúkrunarheimili. Margir fá þá bara vasapeninga. Sumir þurfa að gista með öðrum í herbergi og þótt fólk fái sérherbergi þá fær það ekki endilega miklu að ráða um skipulagið,“ segir Anna Birna sem vill uppstokkun í kerfinu.

„Við erum að vinna að því í Sóltúni að byggja upp fjölbreytileika. Við viljum að fólk geti hannað sín efri ár eins og það sjálft sér fyrir sér. Að það þurfi ekki þessa þrautagöngu sem síðan leiðir til vistunar í hjúkrunarrými,“ segir hún og segist sjá fyrir sér að tengja búsetu fólks á eigin heimili við hjúkrunarheimilin. Með því missi fólk ekki yfirráð yfir eigin lífi en fái samt meira aðgengi að þjónustu vegna veikinda sinna.

Anna Birna segir ríkið sofa á verðinum þegar kemur að uppbyggingu þjónustu við aldraða. „Við höfum árum saman boðið lóð við hliðina á okkur en það gengur mjög hægt að þær áætlanir nái fram að ganga,“ segir hún og segist hitta fólk á hverjum degi sem er í stökustu vandræðum, hafi bæði lítið á milli handanna og of lítið með sitt líf að gera. Því sé réttlætismál að afnema vasapeningakerfið. „Eitt er að missa heilsuna, annað að missa fjárráðin. Það gengur of hægt að breyta þessu,“ segir Anna Birna.



Fréttin birtist fyrst í Fréttablaðinu 8. júní 2016