Þrír menn og einn köttur

Við Hafsteinn Gunnar Sigurðsson kvikmyndatökumaður fengum að fljóta með Friðriki Erni Hjaltested ljósmyndara á ferð eftir suðurströnd Íslands. Ætlunin var að taka ógleymanlega mynd af Hrollaugseyjarvita út af Suðursveit og kötturinn Filma var með í för.“

Þannig farast Huldari Breiðfjörð orð þegar hann er beðinn að lýsa í stuttu máli efni annarrar myndar af tveimur sem sýndar verða í Listasafni Reykjavíkur, Hafnarhúsi, annað kvöld undir yfirskriftinni Bestu vinir mannsins. Þær fjalla um samskipti manna og dýra.

Ferðin varð hálfgerð hrakfallaför, að sögn Huldars.

„Til stóð að fara á gúmmíbát frá Jökulsárlóni en þar var bara fullt af ís úti fyrir ströndinni svo það reyndist of hættulegt. Þá var farið í að finna annan stað, og annan stað og annan stað. Og kötturinn var greinilega með önnur plön en eigandinn svo úr þessu öllu urðu talsverð vandræði.

En myndin sýnir að á bak við hinar listrænu myndir ljósmyndara getur verið gríðarleg fyrirhöfn.“

Hin myndin sem sýnd verður heitir Drottins náð og er eftir Kristján Loðmfjörð. Þar deila þrettán einstaklingar persónulegri reynslu sinni af samvistum við dýr. Myndin er tekin upp í sveitum landsins þar sem nánd við húsdýrin er ráðandi þáttur í daglegum störfum og lífi.

Kvikmyndasýningin hefst klukkan 20. Myndirnar verða endursýndar  4. ágúst og 1. september á sama tíma.



 

Greinin birtist fyrst í Fréttablaðinu 7. júní 2016.