Emilía Rós og Aron Þór eru vinsælust nafna á íslensk börn

Aron var vinsælasta nafngift íslenskra sveinbarna á síðasta ári, sjötta árið í röð, en vinsælasta nafnið sem foreldrar völdu nýfæddum stúlkubörnum var Emilía.

Síðustu þrjú ár hafa Aron, Alexander og Viktor skipað þrjú efstu sætin yfir vinsælustu nöfn nýfæddra drengja. Hjá stúlkum fór nafnið Emilía úr því að vera níunda vinsælasta nafnið árið 2014 í það að vera vinsælast í fyrra.

Þetta kemur fram í nýrri samantekt Hagstofu Íslands. Úr tölunum má lesa að meiri fjölbreytni gætir í nafngiftum stúlkna en drengja og eru vinsældarlistar milli ára mun fjölbreyttari þegar kemur að nöfnum stúlkna. Til að mynda voru nöfnin Sara, Ísabella og Elísabet meðal fimm algengustu nafngifta stúlkubarna í fyrra en komust ekki á topp tíu listann árið á undan.

Langflest börn sem fæðast hér á landi hljóta tvö nöfn.

Langvinsælasta millinafn drengja er nafnið Þór en það hefur lengi verið vinsælt millinafn. Rúmlega hundrað drengir hlutu nafnið eða um fimm prósent af fæddum drengjum í fyrra.

Vinsælasta millinafn stúlkubarna var nafnið Rós en 53 stúlkubörnum var gefið nafnið í fyrra.

Á 19. öld heyrði til undantekninga að íslenskum börnum væru gefin tvö nöfn. 

Tvínefnasiðurinn er tiltölulega ung bylgja en talið er að hann sé dönsk tíska sem hafi borist hingað til lands snemma á átjándu öld.

Í íslenskum manntölum eru fyrstu tvö dæmin um tvínefni nöfn danskra systkina í manntali frá árinu 1703, þau Axel Friðrik Jónsson og Sesselja Kristín Jónsdóttir.

Algengustu samsetningar landsmanna í ársbyrjun 2016 voru eins og í fyrra. Hjá körlum voru þær Jón Þór, Gunnar Þór og Jón Ingi. Hjá konum voru þrjár algengustu samsetningarnar Anna María, Anna Margrét og Anna Kristín.

Eins og síðustu ár er að sjá snarpa fjölgun í stökum „nýjum“ nöfnum. Eitt athyglisvert dæmi er nafnið Baltasar. Nafnið var áttunda vinsælasta eiginnafn drengja í fyrra en 24 sveinbörn hlutu nafnið. Fyrir aldamótin árið 2000 báru aðeins fjórir nafnið, þar á meðal leikstjórinn Baltasar Kormákur, faðir hans og sonur. Árið 2012 hétu 52 karlar Baltasar en í dag eru þeir rúmlega 150 talsins.

Nöfnin Jón og Guðrún hafa um aldir verið langalgengustu mannanöfnin á Íslandi og hafa tískustraumar í nafngiftum ekki enn slegið hinum klassísku, íslensku eiginnöfnum við. Samkvæmt manntalinu frá 1703 hétu 23,5 prósent allra íslenskra karla Jón og 19,7 prósent kvenna báru nafnið Guðrún.

Talsvert hefur dregið úr tíðni þessara nafna síðan þá en um þrjú prósent karla og þrjú prósent kvenna bera nafnið. Tæplega 5.200 karlar svara nafninu Jón og um 4.700 konur nafninu Guðrún. Annað sætið verma Sigurðar og Önnur landsins, en þeir eru um 4.200 talsins og þær um 4.500.

Ekki er að sjá að Jón og Gunna láti í minni pokann fyrir öðrum nöfnum fljótlega en ef fram heldur sem horfir gætu Aron og Emilía tekið við af þeim sem hinir dæmigerðu Íslendingar í framtíðinni.