Friðarsúlan tendruð í tíunda skiptið á morgun

Á morgun verða níu ár liðin frá því kveikt var á Friðarsúlunni í Viðey í fyrsta sinn. Af því tilefni veitir Yoko Ono fjórum alþjóðlegum friðarsinnum viðurkenningu úr LennonOno-friðasjóðnum sem veitt eru annað hvert ár við tendrun friðarsúlunnar.

Friðarsúlan í Viðey verður tendruð í 10. skipti með friðsælli athöfn á fæðingardegi Johns Lennons annað kvöld og verður kveikt á henni til 8. desember sem er dánardagur Lennons. Af þessu tilefni er Yoko Ono stödd hér á landi og frá því friðarsúlan var sett upp árið 2006 hefur hún vanið komur sínar til landsins til þess að tendra friðarsúluna og það er ekki að ástæðulausu sem hún valdi Ísland fyrir minnismerki um frið.

„Ástæða þess sem ég valdi Ísland er sú að þessi þjóð býr yfir ótrúlega miklum sannleika og ótrúlega velmótaðri hugmynd um hvernig á að áorka hlutunum. Við verðum að læra af fólki og þjóðum hvernig á að afreka hlutina. Allir náðu þessi í sameiningu,“ segir Yoko Ono.

Hún segir að hugmyndin af friðarsúlunni sé áratuga gömul og í fyrstu hafi enginn sýnt því áhuga að setja hana upp.

„Á þeim tíma hafði enginn áhuga á þessu. Það var ótrúlegt. Það voru bara við John sem bjuggum yfir ótrúlega mikilli sannfæringu um að ná heimsfriði. Þannig gerðist það.“

Yoko Ono hefur í áratugi barist fyrir friði í heiminum en frá árinu 2002 hefur hún veit styrki úr LennonOno-friðarsjóðnum þar sem alþjóðlegir friðarsinnar fá viðurkenningu og segir hún stöðust sé unnið að því að ná heimsfriði.

„Nú gera allir jarðarbúar sér grein fyrir mikilvægi heimsfriðar. Hver og einn ætti að fá ósk sína uppfyllta,“ segir listakonan.

Friðardagar eru haldnir í Reykjavík þessa dagana og er margir viðburðir á dagskrá. Öllum er boðið að vera viðstaddir tendrun Friðarsúlunnar og verður boðið upp á fríar ferju- og strætóferðir. Athöfnin hefst klukkan 8 í Viðey annað kvöld.