Maður illa brunninn eftir að hafa fallið í heitan hver á Flúðum

Stjórnstöð Landhelgisgæslunnar barst um klukkan 20:50 í kvöld beiðni um aðstoð þyrlu vegna manns sem fallið hafði ofan í heitan hver á Flúðum.

Þyrla Landhelgisgæslunnar var á nætursjónaukaæfingu á Snæfellsnesi er kallið barst. Hélt hún þá þegar af stað til eldsneytistöku og til að sækja viðeigandi sáraumbúðir en hélt síðan á slysstað.

Sjúkrabíll ók til móts við þyrluna við Skeiðavegamót og var hinn slasaði færður þar yfir í þyrluna.

RÚV greinir frá því að maðurinn sé um sjötugt og að hann sé illa brunninn eftir slysið. Í sömu frétt er einnig greint frá að hverinn hafi verið um 80 gráðu heitur.

Þyrlan lenti svo við Landspítala Háskólasjúkrahús á ellefta tímanum í kvöld.