Bíl stolið frá World Class: „Merktur fyrirtækinu gjörsamlega í bak og fyrir“

Sendiferðabíll, í eigu World Class líkamsræktarstöðvanna, var tekinn ófrjálsri hendi af bílaplani fyrir framan World Class í Laugum í morgun.

„Sá sem var á honum setti hann í gang til að hita hann og skrapp svo inn til að pissa. Það leið ekki nema svona hálf mínúta og þá hafði þjófurinn hlaupið inn í hann og ekið á brott,“ segir Björn Leifsson, einn eigenda World Class, í samtali við Vísi. „Bíllinn er merktur fyrirtækinu gjörsamlega í bak og fyrir.“

Útlit ökutækisins er afar einkennandi. Bíllinn er eldrauður Toyota Hiace sendiferðabíll og líkt og áður segir er hann rækilega merktur World Class. Skráningarnúmerið er SZ-H99.

Aðspurður segir Björn að fyrirtækið lendi ekki oft í því að stolið sé frá því. „Það gerist reglulega að einhver óprúttinn stelur verðmætum úr klefunum en við lendum ekki í því. Einn og einn á það til að stinga minnstu handlóðunum í vasann og taka þau með sér en það er sjaldgæft,“ segir Björn.

Verði einhver var við bílinn eða veit hvar hann er niðurkominn er sá hinn sami beðinn um að koma upplýsingum til lögreglunnar, sími 444-1000, eða World Class í síma 553-0000.