Styttri opnunartími leikskóla bregður fæti fyrir fólk á vinnumarkaði

Sérfræðingar hjá félagsþjónustusviði Árborgar hafa lýst yfir þungum áhyggjum vegna styttingar opnunartíma leikskóla og skólavistunar í sveitarfélaginu sem tók gildi 1. febrúar. Dæmi eru um að fólk hafi sagt upp störfum sínum þar sem það getur ekki sinnt vinnutíma sínum eftir að breytingarnar taka gildi. Bæjarráð Árborgar hefur óskað eftir fundi með félagsmálastjóra vegna málsins.

Í ályktun sem félagsþjónustusvið sendi bæjarráði á dögunum segir að ljóst sé að þessi skerðing á þjónustu við barnafjölskyldur komi sér einkum illa við láglaunafólk sem oft vinni lengur á daginn, og einstæða foreldra. Þegar hafi foreldrar tíu barna leitað til félagsþjónustunnar vegna breytinganna og lýst áhyggjum sínum, vanlíðan og kvíða. Einhverjir þeirra eigi rétt á fjárhagsaðstoð og muni nýta sér þann rétt. Nú þegar er ein slík umsókn á borði félagsþjónustunnar.

Þá segir jafnframt að ljóst sé að aðgerðirnar muni fyrst og fremst bitna á börnum sem þurfi jafnvel í ljósi aðstæðna að leita stuðnings og eftirlits hjá öðrum en fjölskyldu. „Höfum við áhyggjur af líðan og velferð barna í samfélagin,“ segir í ályktuninni.

Að mati sérfræðinganna er ljóst að frekari samfélagslegar breytingar þurfi að eiga sérs tað samhliða slíkri þjónustuskerðingu leikskóla og skólavistunar, til að mynda viðhorf til vinnutíma foreldra og gæðatíma fjölskyldunnar.

Bæjarráð tók málið fyrir í morgun þar sem óskað var eftir að félagsmálastjóri komi inn á næsta fund til frekari upplýsingagjafar. Þá taldi S-listinn fulla ástæðu til þess að taka þessar áhyggjur alvarlega. Mikilvægt sé að vera tilbúin til að endurskoða fyrri ákvörðun ef nauðsyn krefur.

Öllum leikskólum sveitarfélagsins Árborgar og skólavistunum grunnskólanna er nú lokað klukkan 16.30 á daginn, en áður voru þeir opnir til 17 eða 17.15.