Tengja tónlistina við náttúruna

Ég finn að ferðamenn eru mikið að spyrja um íslenska tónlist en vita lítið hvar á að leita þannig það er spurning hvort við ættum ekki að færa þeim tónlistina,“ segir tónlistarmaðurinn Stefán Jakobsson sem hefur tekið við Sumartónleikum við Mývatn sem hefur slegið taktinn í menningarlífi Mývetninga undanfarin 30 ár. Frænka Stefáns, Margrét Bóasdóttir, hefur séð um tónleikana en afhenti Stefáni kyndilinn og fékk hann þær Steinunni Camillu Stones og Soffíu Kristínu Jónsdóttur með sér.

„Margrét hefur verið með þessa tónleikaröð í 30 ár og staðið sig einstaklega vel. Hún er búinn að standa í þessu ein sem er afrek því þetta er mikil vinna. Hún hefur einblínt á tónlist sem hún þekkir vel eins og klassíska tónlist en við ætlum að víkka þetta meira og það er engin tónlist sem er ekki velkomin.“

Stefán starfar sem leiðsögumaður í Mývatnssveit sem og að þenja raddböndin með rokksveitinni Dimmu. Hann er því nálægt ferðamönnum sem koma í sveitina og segir að tækifæri séu í því að færa ferðamönnum íslenska tónlist í sveitinni. „Við erum að þróa hugmyndina. Þetta verður fyrsta sumarið okkar en við viljum tengja tónlistina við náttúruna og gera hana jafn þekkta og náttúruna í sveitinni.

Það er nóg um að vera í sveitinni en það er alltaf hægt að bæta á sig blómum. Svo þróum við þetta áfram hægt og rólega. En okkur langar að halda tónleika í Stórugjá eða við Jarðböðin eða á einhverri eyju út í vatni eða í raun hvar sem er. Við erum með ákveðnar pælingar og háleitar hugmyndir og ef ég á að vera hreinskilinn þá erum við bjartsýn á að þetta gæti orðið eitthvað stórt og skemmtilegt og sem fjölbreyttast. Það er alveg hægt að spila pönk í Dimmuborgum eða bara að Dimma spili í Dimmuborgunum –það er kannski hugmynd.“

Eðlilega ætlar Stefán að taka lagið á sinni eigin hátíð. „Já ekki spurning. Sem músíkant í allskonar þá kemur ekki annað til greina,“ segir hann og hlær.