Þungvopnaðir menn sakaðir um sérstaklega hættulega líkamsárás í Vogahverfi

Ríkissaksóknari hefur ákært þrjá karlmenn fyrir sérstaklega hættulega líkamsárás, hótanir og vopnalagabrot fyrir að hafa ráðist inn í húsnæði í Vogunum í Reykjavík í febrúar 2015 en mennirnir voru vopnaðir hnífi, skammbyssu og riffli.

Mönnunum er gefið að sök að hafa sparkað upp hurð á annarri hæð hússins og ruðst inn til konu sem þar bjó. Einn mannanna á að hafa slegið hlaupi riffilsins í bringu konunnar og þá á annar mannanna að hafa hótað henni ef hún hringdi á lögregluna með því að draga fingur yfir háls sér.

Þá eru mennirnir einnig ákærðir fyrir að hafa sparkað upp hurð á annarri íbúð á sömu hæð hússins og ráðist þar á karlmann sem þar bjó. Samkvæmt ákæru veittist einn mannanna að honum með spörkum og höggum þar sem brotaþoli lá í rúmi sínu auk þess sem hann skar manninn í andlitið með hnífi. Þá beindi hann skammbyssu að hné mannsins á meðan einn hinna ákærðu stóð hjá og beindi riffli að brotaþola.

 

Í þriðja lagi eru mennirnir ákærðir fyrir að hafa ruðst inn í annað herbergi í sömu íbúð þar sem tveir þeirra réðust á mann sem þar var inni. Beindi einn mannanna riffli að honum og annar réðst á hann þar sem maðurinn lá í gólfinu og sló hann nokkur högg í andlitið, hafði í hótunum um að drepa hund mannsins og veittist að honum með hnífi og skar hann í andlitið.

Að auki er einn mannanna ákærður fyrir sérstaklega hættulega líkamsárás og hótanir gagnvart barnsmóður sinni og fyrrum sambýliskonu. Er honum gefið að sök að hafa slegið hana ítrekað með krepptum hnefa í höfuð og líkama, sparkað í andlit hennar, hótað að drepa hana og tekið hana kyrkingartaki.

Búið er að þingfesta málið í Héraðsdómi Reykjavíkur en ekki liggur fyrir hvenær aðalmeðferð þess fer fram.