Tvær íbúðir í sömu blokk óíbúðarhæfar

Fyrir tæpu hálfu ári féll dómur í héraðsdómi í máli leigjenda á Ásbrú gegn leigusala vegna myglusvepps í íbúðinni sem heilbrigðiseftirlitið og aðrir fagaðilar höfðu greint, svo sem dómskvaddir matsmenn. Leigufélaginu var gert skylt að endurgreiða leiguna á tímabilinu og borga hreinsun á búslóð fjölskyldunnar, þar sem félagið hafi verið upplýst um rakaskemmdirnar án þess að bregðast við.

Leigufélagið hefur áfrýjað dómnum til Hæstaréttar og leigjendurnir gagnáfrýjuðu enda vilja þeir fá búslóðina að fullu bætta þar sem þeir telja ekki hægt að hreinsa sveppagró úr húsgögnum. Leigusalar hafa haldið því fram að rakaskemmdir megi rekja til slæmrar umgengni leigjenda.

Nú hefur Heilbrigðiseftirlit Suðurnesja dæmt aðra íbúð í sama stigagangi óíbúðarhæfa vegna rakaskemmda. Fjölskyldan sem bjó í íbúðinni flutti út fyrir þremur vikum en hefur farið á milli lækna undanfarið ár vegna stanslausra veikinda og slens.

„Þriggja ára sonur minn hefur gjörbreyst. Hann var alltaf veikur, vældi og fór inn í skel sína þegar hann hitti ókunnuga. Nú hleypur hann kátur í fangið á gestum sem koma til okkar,“ segir Elva Dögg Sigurðardóttir, sem bjó í íbúðinni ásamt manni sínum og tveimur börnum. Eftir mikið ráðaleysi vegna veikinda fjölskyldumeðlima bað Elva fulltrúa frá leigufélaginu að skoða skemmd á útvegg því hana var farið að gruna að um myglusveppaveikindi væri að ræða. „Sá sem kom að skoða sagði rakaskemmdina ekki vera neitt. Að þetta væri bara loftbóla en kíttaði samt til öryggis að utan.“

Elva tók þá málið í eigin hendur og lét taka sýni til að senda til greiningar á Náttúrufræðistofnun Íslands. Þá kom í ljós að svartmygla var í veggnum og lifandi mítlar. Einnig mældist mikill raki í veggjum í svefnherbergjum. Þá flutti fjölskyldan út og lét heilbrigðiseftirlitið vita. 

Strax örfáum dögum eftir flutningana gjörbreyttist líðan barnanna. Þau eru ekki lengur með kvef, útbrot og bólgur.

„Við höfum heyrt af mörgum hér á Ásbrú sem hafa grun um að myglusveppur sé í íbúðunum en þeir flýja út því þeir fá engin svör eða skoðun frá leigufélaginu,“ segir Elva. „Nú erum við með vottorð frá heilbrigðiseftirlitinu þannig að félagið leyfir sér varla að leigja út okkar íbúð aftur án þess að bregðast við.“

Ingvi Jónasson, framkvæmdastjóri leigufélagsins Ásabyggð, segir að að sjálfsögðu verði brugðist við skemmd í íbúðinni. Þarna sé um leka í glugga að ræða sem lítið mál sé að laga. „Eins og í öllum húsum getur þetta komið fyrir. Við vissum ekki af þessum leka en öll hús geta lekið og það mun taka tvo til þrjá tíma að laga þetta.“

Ingvi segir engan myglufaraldur vera í íbúðum á Ásbrú og þvertekur fyrir að kvartað sé yfir óvenju miklum rakaskemmdum. Hann bendir á að 700 íbúðir séu til leigu á svæðinu og eðlilegt að ýmis mál komi upp þar sem þörf sé á viðhaldi. Hann segir að ekki verði athugað sérstaklega með myglusvepp í öðrum íbúðum stigagangsins enda liggi ekki fyrir að um slíkt vandamál sé að ræða og ekki samhengi á milli þessara tveggja tilvika. 

„Þarna er um tvö ólík mál að ræða. Í öðru tilfellinu er leki sem gert verður við og í hinu tilfellinu snýst þetta um hvernig íbúar gengu um húsnæðið.“ 

Þessi grein birtist fyrst í Fréttablaðinu þann 31. mars.