Verslunareigandi í miðbænum: „Maður er bara með heyrnarhlífar í búðinni“

„Ég verð að fara á svona hálftíma fresti og raða upp í hillurnar, annars hrynur þetta allt niður. Þetta er ekki bara þreytandi, ég er alveg að verða brjálaður,“ segir Símon Sverrisson, eigandi skartgripaverslunarinnar Eureka-Art við Laugaveg 8.

Framkvæmdir standa nú yfir í næsta húsi við verslunina, eða nánar tiltekið við Laugaveg 4-6, og hafa íbúar og verslunareigendur margir hverjir kvartað sáran yfir ónæði af völdum þeirra. Símon segist orðinn afar þreyttur á þessum stanslausa hávaða sem nú hefur staðið yfir í rúman mánuð.

Allt skelfur og nötrar

„Þetta er bara alveg klikkað. Það skelfur allt og nötrar og það fer hérna úr hillunum. Þegar þú labbar eftir gólfinu þá nötrar það allt. Maður er alveg búinn í hausnum eftir daginn og þegar verst er þá er maður bara með heyrnarhlífar í búðinni,“ segir hann.

Verslunin hefur verið staðsett á Laugavegi frá árinu 2009 og hafa viðskiptin gengið vel hingað til, að sögn Símonar. Núna hins vegar óttast hann um reksturinn. „Núna ganga viðskiptin bara ekki neitt. Það er auðvitað ekkert hægt að labba Laugaveginn út af þessum framkvæmdum og ef fólk kemur hingað inn þá fer það bara aftur út.“

Fær ekki að hafa auglýsingaskilti úti á götu

Símon segist hafa rætt málið við Reykjavíkurborg og reynt að leita lausna, en án árangurs. Borgin sé algjörlega ósamvinnuþýð. „Ég fæ engin svör frá þeim. Þegar ég setti skilti út við gangstéttarbrúnina þá komu þeir frá borginni og sögðu mér að ég hefði ekki leyfi fyrir þessu. En hvað á ég að gera? Það er búið að eyðileggja buisnessinn fyrir mér. Salan hefur hrunið og síðan má ég ekki auglýsa mig? Þetta er alveg makalaust.“

Þá segir hann það ekki vitað hver áætluð verklok séu. Hins vegar gangi þetta ekki mikið lengur og íhugar nú að sækja bætur vegna málsins.

Eftirfarandi myndband tók Símon til að sýna fram á það ónæði sem skapast hefur að undanförnu.