Sýndi yfir hundrað myndir af holum í Reykjavík

Rætt var um slæmt ástand gatna á borgarstjórnarfundi í gærkvöldi. Mikið hefur verið rætt um óviðunandi ástand gatna borgarinnar að undanförnu. Götur eru víða illa farnar og mikið af holum eru sjáanlegar.

Kjartan Magnússon, borgarfulltrúi Sjálfstæðisflokksins, óskaði eftir myndum frá borgarbúum af ástandi gatna og fékk sendar hundruð mynda sem teknar voru víðsvegar um borgina. Myndunum varpaði hann á vegg á fundinum í gærkvöld. 

„Markmiðið með myndbirtingunum var að sýna borgarfulltrúum hvernig ástandið er um alla borg. Ég tel að mér hafi tekist nokkuð vel að upplýsa þá um að ástandið sé ekki gott. Það er að minnsta kosti ekki viðunandi,“ segir Kjartan.

Í síðustu viku var samþykkt í borgarráði samkomulag milli Vegagerðarinnar og sveitarfélaga á höfuðborgarsvæðinu um viðhald og endurnýjun gatna og segir Dagur B. Eggertsson, borgarstjóri, að viðgerðir séu þegar hafnar. 

Sveitarfélögin á höfuðborgarsvæðinu og Vegagerðin meta þörfina á viðhaldi og endurnýjun og setja fram sameiginlega framkvæmdaáætlun sem miðar að því að ráða bót á ástandi gatna, að sögn Dags. „Mikilvægt er að íbúar sveitarfélaganna láti vita af holum til að hægt sé að huga að þeim," segir Dagur og bætir við að endurnýjun gatna hefjist um leið og viðrar til þess. 

Kjartan telur þó að nauðsynlegt sé að borgin auki fjármagn til viðgerða á götum. „Samkvæmt fjárhagsáætlun er bara verið að setja 500 milljónir króna í malbiksviðhald borgargatna í Reykjavík en það þyrftu að vera 700 milljónir bara til þess að halda í horfið," segir Kjartan.