Páll Óskar og Jean Eric Von Baden sjá um fjörið í The Color Run

Um aðra helgi fer fram The Color Run by Alvogen litahlaupið og má búast við tíu til tólf þúsund manns í Hljómskálagarðinum samkvæmt fréttaflutningi af miðasölu í hlaupið. Í fyrra var uppselt og stefnir í að það verði aftur uppi á teningnum í ár því verið er að selja síðustu miðana í hlaupið þessa dagana.

„Heilmikil skemmtidagskrá er fyrirhuguð í endamarkinu þar sem danski plötusnúðurinn Jean Eric Von Baden mun halda uppi stuðinu líkt og í fyrra. Það eru allir sammála um að hann hafi verið algerlega frábær,” segir Davíð Lúther Sigurðarson, framkvæmdastjóri The Color Run á Íslandi. 

Jean Eric Von Baden er enginn viðvaningur þegar kemur að því að halda uppi fjörinu á stórum viðburðum en á síðustu árum hefur hann meðal annars komið fram á Ólympíuleikunum í Peking, hitað upp fyrir tónleika David Guetta og spilað á skemmtistaðnum Pacha á Ibiza.

Auk þess hefur Jean Eric stýrt einkasamkvæmum hjá Pharrell Williams, Grace Jones, Michael Phelps og P. Diddy.

„Hann kann þetta betur en nokkur annar í heiminum sennilega eftir að hafa stjórnað stuðinu í meira en 20 litahlaupum um öll Norðurlöndin. Það er alveg óhætt að segja að kunni þetta nokkuð vel.”

Jean Eric verður þó ekki einn á ferð því með honum á sviðinu verða allt að tíu dansarar ásamt Sigga Hlö, Nökkva Fjalari og Evu Ruza sem öll snúa aftur sem kynnar í litahlaupinu, að ógleymdum Páli Óskari Hjálmtýssyni sem einnig mun trylla gesti hlaupsins með magnaðri sýningu eftir að þátttakendur eru komnir í mark.

„Strax eftir hlaupið í fyrra tókum við ákvörðun um að reyna að toppa okkur og gera upplifun þátttakenda enn betri í ár, sem var reyndar mikil áskorun því þetta gekk svo svakalega vel í fyrra. Við höfðum strax samband við Pál Óskar og hann vildi ólmur vera með okkur. Ef það er einhver sem á að troða upp eftir svona sýningu þá er það hann. Palli er fullkominn í þetta show,” segir Davíð.