Lilja ræddi við Gordon Brown um Icesave

Lilja Alfreðsdóttir utanríkisráðherra hitti Gordon Brown fyrrverandi forsætisráðherra Bretlands fyrir tilviljun á flugvellinum í Istanbúl en þau voru bæði á leið til Brussel með Turkish Airlines.

Lilja sótti ráðstefnu Sameinuðu þjóðanna um mannúðarmál í Istanbúl í upphafi vikunnar. Gordon Brown er fyrrverandi forsætisráðherra Bretlands en ríkisstjórn hans beitti hryðjuverkalögum gegn Íslandi í bankahruninu haustið 2008. Með því vildi hann tryggja hagsmuni Breta vegna Icesave-reikninga Landsbankans. Um var að ræða afar umdeilda ákvörðun sem olli Íslendingum talsverðu tjóni. Þær skýringar voru gefnar á sínum tíma að bresk stjórnvöld hefðu dagana á undan orðið var við mikla fjármagnsflutninga frá Lundúnum til Íslands. Lilja var á þeim tíma í hringiðu þessara atburða sem starfsmaður Seðlabankans.

Lilja gaf sig á tal við Brown og samtalið hélt áfram um borð í vél Turkish Airlines þar sem meðfylgjandi mynd náðist á snjallsíma. 

„Jú, það var óvænt að rekast á Gordon Brown á flugvellinum í Istanbúl. Hann birtist áður en við vorum kölluð um borð og settist við hliðina á mér. Ég hafði ekki hitt þennan mann áður og kynnti mig því fyrir honum. Ég ætlaði nú bara að kasta á hann kveðju, en samtalið dróst á langinn og var hið áhugaverðasta," segir Lilja.  

Rædduð þið Icesave? 

„Við áttum heiðarlegt og faglegt spjall um ýmis mál sem snerta samskipti Íslands og Bretlands, þar á meðal um Icesave. Hann bað fyrir bestu kveðju til Íslands og gladdist yfir þeim mikla árangri sem Íslendingar hafa náð á undfanförnum árum.“