Minnast vina í óvissu um ástæður flugslyss

Bílaklúbbur Akureyrar afhjúpaði í gær minnisvarða um Pál Steinsdór Steindórsson og Pétur Róbert Tryggvason sem fórust í flugslysi á svæði bílaklúbbsins fyrir þremur árum þegar sjúkraflugvél Mýflugs brotlenti á svæðinu af ókunnum ástæðum.

Einar Gunnlaugsson, formaður bílaklúbbsins, segir atburðinn hafa legið þungt á félagsmönnum allan þennan tíma.

Rannsóknarnefnd flugslysa hefur ekki enn birt skýrslu sína um orsakir þess að sjúkraflugvélin af gerðinni Beechcraft B200 Super King Air brotlenti fyrir þremur árum.

„Það er auðvitað erfitt að hafa ekki fengið skýrslu rannsóknarnefndarinnar. Á meðan bíðum við í óvissu og þá fara að vakna hugmyndir um orsakir sem ekki eru á rökum reistar,“ segir Einar.

Með afhjúpun minnisvarðans er ætlunin að reyna að ná einhverri niðurstöðu í málið.

„Þessi atburður er til þess ætlaður að setja ákveðinn punkt aftan við þetta mál. Lífið heldur áfram og við viljum minnast þeirra fyrir þá menn sem þeir höfðu að geyma,“ segir Einar. 

Geir Kristinn Aðalsteinsson, formaður Íþróttabandalags Akureyrar, hélt ræðu við tilefnið.

„Við munum líklega öll hvar við vorum stödd þegar við fengum fréttir af hörmulegu flugslysi sem átti sér stað hér á félagssvæði Bílaklúbbs Akureyrar þar sem tveir miklir heiðursmenn létu lífið,“ sagði Geir Kristinn.

„Litla samfélagið okkar var sem lamað en það var engu að síður aðdáunarvert að sjá samkenndina og stuðninginn sem fylgdi í kjölfarið, hvort sem um ræðir félagsmenn Bílaklúbbsins eða samfélagið í heild,“ bætir Geir við.

Mótorhjólafólk og Bílaklúbbur Akureyrar afhentu síðan við athöfnina hollvinasamtökum sjúkrahússins á Akureyri fjárframlag til kaupa á svokallaðri ferðafóstru sem er sérstaklega hannaður hitakassi fyrir ungbörn.

Samkvæmt barnadeild sjúkrahússins mun þessi gjöf koma að mjög góðum notum þar sem fyrir er gamall hitakassi sem þarfnast endur­nýjunar. Búnaðurinn er notaður þegar flytja þarf veika nýbura strax eftir fæðingu til frekari aðhlynningar i Reykjavík.

Fréttin birtist fyrst í Fréttablaðinu