Yfirlýsing frá nefnd um dómarastörf: Ekki hægt að fallast á að skráningu mála sé ábótavant

Hjördís Hákonardóttir, formaður nefndar um dómarastörf, telur ekki unnt að fallast á það skráningu mála sé nú ábótavant hjá nefndinni. Skráningin hefur verið til umræðu eftir að tilkynningar um hlutabréfaviðskipti Markúsar Sigurbjörnssonar, forseta hæstaréttar, fundust ekki við upphaflega leit.

Síðar kom í ljós að Markús hafði tilkynnt um hlutabréfaviðskipti sín til nefndarinnar en eitt slíkt bréf fannst til að mynda á mánudagskvöldið. Í tilkynningu frá nefndinni segir að frá árinu 2010 hafi öll erindi til nefndarinnar verið skráð.

„Frá árinu 2010 hafa öll erindi til nefndarinnar, hvort sem um er að ræða kvartanir frá þeim sem telja að dómari hafi brotið á þeim í starfi sínu, erindi frá dómurum vegna tilkynninga um aukastörf og eignarhluti í félögum og atvinnufyrirtækjum, sem og bréf nefndarinnar til dómara þar sem kallað hefur verið eftir upplýsingum frá þeim verið skráð hjá nefndinni,“ segir í tilkynningu.

Þá sé unnið að því að vinna að skráningu eldri mála.

„Nefndin hefur einnig unnið að skráningu eldri erinda sem henni bárust fyrir árið 2010 og er þeirri skráningu að mestu lokið. Það er því ekki unnt að fallast á það að skráningu mála sé nú ábótavant hjá nefndinni.“

Tilkynning nefndar um dómarastörf í heild sinni

„Vegna umræðu um hvernig skjalavörslu og skráningu erinda hjá nefnd um dómarastörf er háttað telur nefndin rétt að leiðrétta þann misskilning sem virðist ríkja.

Frá árinu 2010 hafa öll erindi til nefndarinnar, hvort sem um er að ræða kvartanir frá þeim sem telja að dómari hafi brotið á þeim í starfi sínu, erindi frá dómurum vegna tilkynninga um aukastörf og eignarhluti í félögum og atvinnufyrirtækjum, sem og bréf nefndarinnar til dómara þar sem kallað hefur verið eftir upplýsingum frá þeim verið skráð hjá nefndinni. Þar eru jafnframt skráð svör nefndarinnar við erindum og úrskurðir hennar í einstökum málum. Þá eru álit nefndarinnar birt á vef dómstólaráðs domstolar.is

Nefndin hefur einnig unnið að skráningu eldri erinda sem henni bárust fyrir árið 2010 og er þeirri skráningu að mestu lokið. Það er því ekki unnt að fallast á það að skráningu mála sé nú ábótavant hjá nefndinni.

Þá er rétt að taka fram að með nýjum lögum um dómstóla sem taka eiga gildi í byrjun árs 2018 mun nefndin hafa aðstöðu hjá dómstólasýslunni sem tekur við af dómstólaráði. Er því hafinn undirbúningur að aðlögun málaskrár nefndarinnar að málaskrá dómstólasýslunnar.

Hjördís Hákonardóttir formaður nefndar um dómarastörf“