Komin úr skugga atvinnuleysis

Í fyrsta skipti í hálfan annan áratug mælist atvinnuleysi ekki það hæsta á landinu öllu á Suðurnesjum. Þetta er markverður árangur ekki síst í ljósi þess að frá árinu 2006 hafa sveitarfélög á Suðurnesjum þurft að rífa sig upp eftir tvö áföll – brottför hersins og eins og alþjóð eftir efnahagshrunið tveimur árum seinna.

Þetta sýna gögn Vinnumálastofnunar frá árinu 2000 til dagsins í dag. Stóra myndin er sú að atvinnuleysi mælist óverulegt um allt land – er 2,8% á landsvísu. Hins vegar bregður svo við að atvinnuleysi á Suðurnesjum var í lok aprílmánaðar minna en á landsvísu og á höfuðborgarsvæðinu, þó sáralitlu muni á milli atvinnusvæðanna tveggja. Þessi staða hefur ekki verið uppi allt frá aldamótum.

Berglind Kristinsdóttir, framkvæmdastjóri Sambands sveitarfélaga á Suðurnesjum, segir ekkert launungarmál að ein helsta ástæða minnkandi atvinnuleysis á Reykjanesi sé ferðaþjónustan, og afleidd störf. Hún minnir á að gert sé ráð fyrir að um 900 störf skapist á hverja milljón farþega, en 85% starfsmanna Isavia eru búsett á Suðurnesjum.

„Vinna við stækkun flugstöðvar Leifs Eiríkssonar hefur kallað á fjölda iðnaðarmanna sem og uppbygging í Helguvík. Nálægðin við flugvöllinn hefur líka gefið sjávarútvegsfyrirtækjum tækifæri til að koma sínum vörum hratt og örugglega á markaði erlendis. Þetta er afar ánægjuleg þróun, því ef borið er saman atvinnuleysi á Suðurnesjum og t.d. Reykjavík frá árunum 2000-2008, var atvinnuleysi minna á Suðurnesjum. Ástandið sem varð til eftir brotthvarf hersins og fjármálahrunið var því ástand sem við áttum ekki að venjast. Við getum því ekki verið neitt annað en bjartsýn á framtíðina,“ segir Berglind.

Eins og Fréttablaðið greindi frá nýlega þáðu rúmlega helmingi færri einstaklingar eða fjölskyldur fjárhagsaðstoð vegna framfærslu frá Reykjanesbæ fyrstu mánuði þessa árs en á sama tímabili árið 2014. Þetta kemur fram í tölum frá velferðarsviði bæjarins.

Í samhengi má rifja upp áfangaskýrslu samstarfshóps á Suðurnesjum frá árinu 2011 þar sem tölur sýndu að ekkert hafði dregið úr atvinnuleysi á Suðurnesjum frá hruni. Í mars 2011 mældist atvinnuleysi á Suðurnesjum 14,5%, miðað við einstaklinga með bótarétt hjá Vinnumálastofnun, sem var umtalsvert hærra en annars staðar á landinu. Næst á eftir Suðurnesjum kom höfuðborgarsvæðið með 9,2% og yfir landið allt mældist atvinnuleysið 8,6%. 

Fréttin birtist fyrst í Fréttablaðinu 6. júní