Breskir hernaðarsérfræðingar aðstoða her Sáda í Jemen

Breskir hernaðarsérfræðingar hafa undanfarið tekið þátt í stríðinu sem nú geisar í Jemen. Mennirnir eru her Sádí Araba til aðstoðar sem berst nú gegn uppreisnarmönnum í Jemen sem eru Shía trúar.

Að minnsta kosti tíu þúsund óbreyttir borgarar í Jemen hafa fallið í átökunum sem eru í raun átök á milli Sádí Araba annarsvegar, sem styðja stjórnvöld í landinu, og Írana hinsvegar, sem styðja uppreisnarmenn Houti ættbálksins.

Breska varnarmálaráðuneytið fullyrðir að Bretarnir séu Sádum aðeins innan handar til að tryggja að alþjóðlegum reglum í hernaði sé fylgt eftir en bresk mannréttindasamtök hafa gagnrýnt þátttöku þeirra í stríðinu og kallað á endurskoðun á samvinnu Breta við konungsveldið í Sádí Arabíu, sem sætt hefur vaxandi gagnrýni undanfarið.