Forsætisráðuneytið á ekki fyrir grunni sem steyptur var án leyfis á Þingvöllum

Framkvæmdir við sumarhús við Þingvallavatn eru ekki í samræmi við heimildir Þingvallanefndar sem vill neyta forkaupsréttar og eignast steyptan grunn á lóðinni fyrir 70 milljónir króna.

Í sumar sem leið var auglýstur til sölu steyptur grunnur að nýju sumarhúsi í þjóðgarðinum á bakka Þingvallavatns. Eigendurnir, hjónin Bogi Pálsson og Sólveig Dóra Magnúsdóttir, fengu 70 milljóna króna kauptilboð frá Gísla Haukssyni, eiganda fasteignafélagsins Gamma.

Þingvallanefnd ákvað eftir umfjöllun fjölmiðla að neyta forkaupsréttar og óskaði í lok október eftir afstöðu forsætisráðuneytisins til fjármögnunar.

Fram kemur í tölvupóstssamskiptum starfsmanna forsætisráðuneytisins að ekki liggi peningar á lausu fyrir kaupunum. Samkvæmt heimildum Fréttablaðsins verður ákvörðun um málið látin bíða þar til ný ríkisstjórn tekur við.

Vandséð er að byggingin á umræddri leigulóð í eigu ríkisins sé í samræmi við heimildir frá Þingvallanefnd. Í ágúst 2006 óskuðu lóðar­hafarnir eftir því að tengja saman aðalhús og svefnskála með nýju anddyri í stað þess að þau væru tengd saman með palli og skjólvegg.

„Öll hönnunin miðar að því að raska ekki þeim jarðvegi sem húsið stendur á og í kring um það er og verður því alfarið notast við sömu undirstöður og núverandi hús eru byggð á, auk þess sem notast verður við eins mikið af núverandi byggingarefni og ástand þess leyfir,“ segir í erindi Boga Pálssonar og Sólveigar Dóru Magnúsdóttur til Þingvallanefndar sem samþykkti beiðnina enda væri haft að leiðarljósi að raska sem minnstu.

Framkvæmdirnar sem síðan hófust voru ekki í samræmi við það sem Þingvallanefnd samþykkti. „Í ljós hefur komið að lóðarleiguhafar létu rífa sumarhúsin sem stóðu á lóðinni árið 2008 og í stað þeirra var steyptur 133,7 fermetra grunnur úr steinsteypu á stöplum með kjallara en stærð kjallarans er ekki innifalin í framangreindri stærð,“ segir Ólafur Örn Haraldsson þjóðgarðsvörður í bréfi til forsætisráðuneytisins í lok október síðastliðins.

Í bréfi þjóðgarðsvarðar kemur fram að fyrirhuguð bygging sé í „verulegri andstöðu við gildandi byggingarskilmála innan þjóðgarðsins“ og að „verulegs ósamræmis gætir á milli framkvæmdanna sem þegar eru hafnar og orðalags bókunar nefndarinnar“ vegna umsóknar lóðarhafanna.

„Þingvallanefnd telur að þar sem sumarhúsin voru rifin og steyptur var í stað þeirra grunnur á stöplum ásamt kjallara séu hugsanlega í reynd brostnar forsendur fyrir því að endurbygging sumarhúsanna teljist til þeirra lagfæringa eða breytinga sem þegar var búið að samþykkja,“ skrifar þjóðgarðsvörður forsætisráðuneytinu.

Leigusamningurinn við Boga og Sólveigu var endurnýjaður til tíu ára frá 1. janúar 2011.

„Óheimilt er að valda jarðraski eða reisa mannvirki á hinni leigðu lóð eða nágrenni hennar nema að fengnu samþykki Þingvallanefndar,“ er meðal annars undirstrikað í leigusamningnum.

Þó að framkvæmdirnar á lóðinni virðist unnar í leyfisleysi þá vill Þingvallanefnd að ríkið kaupi þar steypugrunn fyrir 70 milljónir króna. Ekki á að beita ákvæði leigusamningsins um vanefndir. „Vanefni leigutaki skyldur sínar samkvæmt samningi þessum hefur hann fyrirgert leigurétti sínum,“ segir í samningnum. 

Fréttin birtist fyrst í Fréttablaðinu