Benedikt svarar ásökunum: Atriðin í besta falli villandi og sum röng

„Þessa dagana gengur nafnlaust myndband um meintan svikaferil minn í viðskiptum og víðar á netinu. Þar eru ýmis atriði úr mínum ferli tekin upp og gefið í skyn að ég sé hinn versti þrjótur. Ég sá að einhverri konu varð flökurt að lesa um þennan ódám.“

Þetta skrifar Benedikt Jóhannesson, formaður Viðreisnar, á vefsíðuna Heimur.is í tengslum við myndband sem gengið hefur um internetið að undanförnu þar sem viðhafðar eru ýmsar ásakanir á hendur honum.

Benedikt segist ekki ætla að fara yfir öll atriði myndbandsins, en fer yfir tvö þeirra í pistli sínum. Hann nefnir fyrst ásakanir um að hann hafi stuðlað að gjaldþroti Eimskipafélagsins.

„Hið sanna í því máli er að Landsbankinn, sem var þá viðskiptabanki Eimskipafélagsins, ákvað að leiða fjandsamlega yfirtöku á félaginu. Orðið „fjandsamleg yfirtaka“ er oftast notuð í þeirri merkingu að yfirtakan sé fjandsamleg fyrir eigendum, en í þetta sinn var hún beinlínis fjandsamleg félaginu sjálfu sem er óvenjulegt,“ skrifar Benedikt. Flestir stjórnendur hafi verið látnir fara á árunum 2003-2004 og að sjálfur hafi hann látið af formennsku árið 2003.

„Þegar ég lét af formennsku var félagið fjárhagslega sterkt með tíu þúsund hluthafa, en eftir 9. október 2003 hafði ég engin afskipti af félaginu.“  

Næst nefnir hann ásakanir um að hann hafi komið Sjúkratryggingum Íslands á laggirnar til þess að einkavæða heilbrigðiskerfið.

„Hér gætir mikils misskilnings. Sjúkratryggingar Íslands sjá um að greiða fyrir hlut ríkisins í heilbrigðisþjónustu og semja um verð á henni. Þetta hlutverk var áður hjá Tryggingastofnun að mestu. Sjúkratryggingar sjá ekki um neina einkavæðingu, en semja við aðila sem veita þjónustu, hvert sem rekstrarformið er,“ segir Benedikt. Hann nefnir það að hann og Ögmundur Jónasson, þáverandi heilbrigðisráðherra, sé ekki þekktur baráttumaður fyrir einkavæðingu en að allt þeirra samstarf hafi verið með miklum ágætum.

Pistil Benedikts í heild má lesa hér en umrætt myndband má sjá hér fyrir neðan.