Líklega lítið hlaup í Fremri Emstruá

Mælir Veðurstofu Íslands í Markarfljóti við Einhyrningsflatir hefur sýnt stöðuga aukningu rafleiðni í ánni seinustu daga, eða frá 7. júlí. Á sama tíma hefur vatnshæð aukist um um það bil 30 sentimetra og neðar í ánni við gömlu Markarfljótsbrúna hækkaði rafleiðni einnig.

„Aukin rafleiðni í Markarfljóti við Einhyrningsflatir er líklega vegna jarðhitavatns undan Entujökli. Smáhlaup úr Entujökli með mikilli lykt eru þekkt í Fremri Emstruá. Þó hlaupin séu ekki stór þá geta þau skemmt göngubrú sem er yfir ánni.

Skálavörður í Emstrum og ferðafólk tilkynntu um sterka brennisteinslykt á svæðinu sem hefur verið þar síðustu daga,“ segir í tilkynningu frá Veðurstofunni sem ítrekar að ekki er búist við mikilli hættu af hlaupvatninu heldur af gasmengun við upptök árinnar og í lægðum í landslaginu umhverfis ána.