Sakfelldur fyrir að telja ekki fram 87 milljónir

Karlmaður á áttræðisaldri var í dag sakfelldur í Héraðsdómi Reykjavíkur fyrir meiri háttar skattalagabrot á árunum 2008 og 2009. Hann hlaut þriggja mánaða skilorðsbundinn fangelsisdóm og þarf að greiða 13,8 milljónir í sekt til ríkissjóðs.

Maðurinn taldi ekki fram til skatts fjármagnstekjur upp á rúmlega 87 milljónir og komst þannig undan því að greiða rúmar 8,7 milljónir í fjármagnstekjuskatt.

Fyrir dómi neitaði maðurinn sök og ítrekaði að það hefði ekki verið ásetningur hans að skjóta neinu undan. Hann sagðist hafa keypt sér aðstoð sérfræðinga til þess að sjá um skattaframtöl sín og staðið í þeirri trú að framtölin væru rétt. Hann vissi hins vegar að hann bæri alla ábyrgð á því að tekjur hans væru réttilega fram taldar.

Þá tók maðurinn fram fyrir dómi að þegar villur í skattframtali hefðu komið í ljós, hefði hann látið skila leiðréttum gögnum og greitt allt sem á hann hefði verið lagt af opinberum gjöldum eftir það að meðtöldu 25 prósent álagi.