„Viðskiptabannið verður afnumið“

Sameiginlegur blaðamannafundur Barack Obama og Raúl Castro lauk um sjöleytið í kvöld. Fundurinn er sögulegur þar sem þetta er í fyrsta skipti sem sitjandi Bandaríkjaforseti heimsækir Kúbu í 88 ár. Heimsóknin þykir því til marks um að aukin og vinalegri samskipti á milli þjóðanna.

Það var Castro sem byrjaði á því að tala til fjölmiðla á fundinum. Hann sagðist fagna afstöðu Obama gegn viðskiptabanninu á Kúbu og sagði að hann vonaðist til þess að því yrði lyft þar sem það hafi skaðleg áhrif á land sitt. Castro sagði einnig að það væri ein krafa sín að því landsvæði sem Bandaríkin ráði nú yfir á Kúbu og er notað undir Guantánamo fangelsið yrði skilað. Hann gagnrýndi Bandaríkin fyrir að veita ekki öllum þegnum sínum jafnan aðgang að heilsugæslu, menntun, mat, launajöfnuði og mannréttindum.

Castro sagði að nú væri verið að ræða ný tengsl á milli þjóðanna sem ekki hefðu þekkst áður. Hann fagnaði því sérstaklega að nú væri útlit fyrir betra aðgengi Kúbverja að lyfjum og tækninýjungum á sviði læknisvísinda.

Kúbverjar fá aðgang að netinu

Obama mætti til Kúbu ásamt allri fjölskyldu sinni og stórum hóp þingmanna sem þykir sýna aukinn áhuga Bandaríkjanna á því að bæta samskipti þjóðanna. Hann talaði um að bandarísk fyrirtæki ætluðu að aðstoða almenning á Kúbu að komast á internetið. Obama sagði að veitt hafi verið leyfi til þess að auka flug- og ferjuferðir á milli landanna og að verið sé að klára skiptinemasamning á milli háskóla í löndunum tveimur.

Obama talaði einnig um að báðar þjóðir væru að undirbúa að fjarlægja höft sem hafa verið á gjaldeyrarskiptum milli landanna.

„Viðskiptabannið verður afnumið!,“ svaraði Obama skýrt þegar hann var aðspurður um hvað hann héldi að kæmi út úr bættum samskiptum þjóðanna. Hann gagnrýndi ákvörðunina um viðskiptabann og sagði að hálfrar aldar saga þess ætti að vera næg til að allir gerðu sér grein fyrir að það virkaði ekki. Núna sé  því kominn tími til þess að prufa aðra nálgun.

Til þess að lyfta banninu þarf þingið að taka upp málið og kjósa. Obama sagði að það gæti því vel verið svo að banninu yrði ekki lyft fyrr en eftir forsetatíð sína.

Hljómsveitin Rolling Stones undirbýr nú fría tónleika á íþróttaleikvangi í Havana en fresta þurfti þeim um tvo daga vegna heimsóknar forsetans. Jagger grínaðist með það á Twitter-síðu sveitarinnar og tilkynnti Obama sem sérstakt upphitunaratriði Stones á Kúbu.