Lítil samkeppni meðal ungmenna um milljónastyrki

Á síðustu þremur árum hefur verkefnið Evrópa unga fólksins, sem er á vegum Evrópusambandsins og er hér á landi undir hatti Ungmennafélags Íslands, styrkt 133 ungmenni um 110 milljónir króna til sjálfboðaliðastarfa í Evrópu. Af þessum 133 ungmennum hafa aðeins um 30 verið íslensk ungmenni sem farið hafa héðan.

„Hinir hafa allir verið að koma til Íslands. Það getur verið forgangsmál hjá okkur að styrkja frekar þá sem vilja fara héðan til sjálfboðaliðastarfs í Evrópu en samkeppni um styrki hér hefur því miður ekki verið til staðar. Vegna þess höfum við getað styrkt fleiri af þeim sem vilja koma. Það komast þó færri hingað en vilja,“ segir Anna R. Möller, forstöðumaður Evrópu unga fólksins, EUF.

Sjálfboðaliðastörfin standa yfir í tvo til tólf mánuði og fá styrkþegar greiddar flugferðir, gistingu og uppihald auk dagpeninga.

„Íslensku ungmennin hafa farið út um alla Evrópu en sækja helst um að fá að fara til Suður-Evrópu. Mestur áhugi er á að fara til Spánar, Ítalíu og Portúgals,“ greinir Anna frá.

Hér á landi hafa sjálfboðaliðar frá Evrópu lagt göngustíga, hreinsað fjörur og starfað fyrir Rauða krossinn svo eitthvað sé nefnt.

Í ár hefur verkefnið Evrópa unga fólksins, sem er nú 20 ára, greitt sjálfboðaliðum 50 milljónir króna í styrki en alls er styrkféð í ár 180 milljónir.

„Auk sjálfboðaliðastarfsins styrkjum við til dæmis verkefni tengd ungmennaskiptum, þjálfun starfsmanna sem vinna í æskulýðsgeiranum, ráðstefnur og námsheimsóknir auk útgáfu handbóka. Allt miðar þetta að því að efla starf með ungu fólki,“ tekur Anna fram.