Ekki vitað hvenær ráðið verður í stöðu skólameistara Borgó

Ráða átti í stöðu skólameistara Borgarholtsskóla þann 1. apríl síðastliðinn. Enn er hins vegar óráðið í stöðuna og gegnir aðstoðarskólameistari, Ingi Bogi Bogason, embættinu til loka apríl að því er segir í frétt á heimasíðu skólans.

Samkvæmt upplýsingum frá innanríkisráðuneytinu er vonast til þess að málið klárist í næstu viku en Ólöf Nordal, innanríkisráðherra, mun ráða í stöðuna í stað menntamálaráðherra, Illuga Gunnarssonar, þar sem einn af umsækjendunum, Ársæll Guðmundsson, starfar sem sérfræðingur í menntamálaráðuneytinu.

Jóhannes Tómasson, upplýsingafulltrúi innanríkisráðuneytisins, segir valnefnd enn vera að störfum en alls sóttu 10 manns um stöðuna, þar á meðal Ingi Bogi aðstoðarskólameistari.

Jóhannes vissi ekki ástæður þess hvers vegna tafist hefur að ráða í stöðuna þegar hann var inntur eftir því. Þá sagði hann ekki hægt að gefa upp nákvæmlega hvenær yrði ráðið í stöðuna þegar hann var spurður hvort ráðið yrði í hana frá 1. maí næstkomandi.