Læknafélagið telur að rekstrarfélögum í heilsugæslu eigi að vera heimilt að greiða arð

Stjórn Læknafélags Íslands telur að rekstrarfélögum í heilsugæslu eigi að vera heimilt að greiða eðlilegan arð af rekstrinum. Annað sé í mótsögn við þær reglur sem gilda um aðra aðila í sambærilegum rekstri.

Þetta kemur fram í ályktun frá félaginu vegna tillagna heilbrigðisráðherra um heilsugæslu höfuðborgarsvæðisins.

Velferðarráðuneytið kynnti í síðasta mánuði að fjármögnun heilsugæslu höfuðborgarsvæðisins verði breytt þannig að fjármagn til reksturs endurspegli þann sjúklingahóp sem viðkomandi heilsugæslustöð þjónar. Markmiðið sé að færa inn í rekstur heilsugæslunnar faglega og fjárhagslega hvata sem stuðli að betri þjónustu, hagkvæmari rekstri og geri heilsugæslunni kleift að vera fyrsti viðkomustaður fólks í heilbrigðiskerfinu.

Í ályktuninni stjórnar Læknafélagsins segir að stjórnin styðji tillögur ráðherra um fjölgun heilsugæslustöðva og heimilislækna til að mæta brýnni þörf íbúa höfuðborgarsvæðisins fyrir  betri þjónustu.

„Með tillögunum er að auki fyrirkomulagi fjármögnunar heilsugæslunnar breytt þannig að hún endurspeglar betur þjónustuþörfina og um leið er opnað fyrir fjölbreytt rekstrarform innan heilsugæslunnar. Hvorutveggja  er í fullu samræmi við sameiginlega yfirlýsingu ríkisstjórnarinnar og læknafélaga í tengslum við kjarasamninga lækna í byrjun síðasta árs. Læknafélag Íslands telur að rekstrarfélögum í heilsugæslu eigi að vera heimilt að greiða eðlilegan arð af rekstrinum enda er annað í mótsögn við þær reglur sem gilda um aðra aðila í sambærilegum rekstri. Annað gæti haft neikvæð áhrif á fjárfestingu og rekstur heilsugæslustöðvanna og þannig unnið gegn markmiðum úrbótanna.“