Barnsfaðirinn sendi nektarmyndir á yfirmennina eftir að hún sagði frá ofbeldinu

Hæstiréttur hefur ómerkt dóm Héraðsdóms Reykjavíkur þar sem móður var dæmd full forsjá yfir þriggja ára dóttur sinni, en faðirinn höfðaði málið og fór fram á forræði. Taldi dómurinn að forsendur hefðu breyst og verður málið því tekið fyrir í héraði að nýju.

Foreldrarnir hófu sambúð hér á landi árið 2011 en fyrir á konan, sem er bandarísk, tvö börn og maðurinn eitt barn, sem hann hefur ekki séð í rúm sjö ár. Sambúð þeirra var stormasöm og sagði maðurinn fyrir dómi að það megi að mestu leyti rekja til þess að konan eigi við geðrænan vanda að stríða.

Konan aftur á móti sagði manninn eiga við áfengis- og fíkniefnavanda að etja og að hann hafi beitt hana bæði líkamlegu og andlegu ofbeldi. Konan hefur lagt fram þrjár kærur á hendur manninum; vegna líkamsárásar, dreifingar nektarmynda og eignaspjalla.

Líkamsárásina kærði konan árið 2014. Hún sakaði barnsföður sinn um að hafa haldið sér fram af svölum og hótað að sleppa, hrint sér niður tröppur á Spáni þar sem hún hafi lent á eldhúsinnréttingu og ýtt henni á svalahurð þannig að vör hennar sprakk. Málið þótti ekki líklegt til sakfellingar og var látið niður falla. Maðurinn neitaði sök.

Hótaði myndbirtingum eftir viðtalið

Konan sagði í blaðaviðtali í DV skömmu fyrir jólin 2014, undir nafnleynd, að maðurinn beitti sig andlegu og líkamlegu ofbeldi, ásamt því sem hún sagði frá því að maðurinn bíði þess að hefja afplánun á dómi sem hann hafi hlotið. Í greininni er jafnframt haft eftir henni að maðurinn neiti að flytja út úr íbúð hennar, en engin gögn gefa til kynna að hann hafi neitað að fara, að því er segir í dómnum.

Eftir að greinin birtist hótaði maðurinn að birta myndir og myndbrot sem sýndu konuna í kynlífsathöfnum, sem hann og gerði. Þá starfaði konan hjá alþjóðlegu tæknifyrirtæki með höfuðstöðvar í Bandaríkjunum og sendi maðurinn myndirnar á valda stjórnendur innan fyrirtækisins. Konan kærði manninn vegna málsins en ekki hefur verið tekin ákvörðun um hvort ákæra verði gefin út.

Bæði hæf en móðirin hæfari

Konan fór fram á fulla forsjá yfir dóttur þeirra og vann konan málið í héraði. Samkvæmt matsmanni voru báðir aðilar hæfir til að gegna foreldraskyldum gagnvart barninu, en að þegar litið væri til persónugerðar, tilfinningaástands og tengslahæfni foreldra stæði maðurinn mun lakar að vígi en konan.

Faðirinn áfrýjaði málinu og var það ómerkt í Hæstarétti, líkt og áður segir. Við málflutning í Hæstarétti var upplýst að konan hefði flutt til Bandaríkjanna með stúlkuna og vísaði Hæstiréttur til þess að niðurstaða dómsins um forsjá móðurinnar með barninu og fyrirkomulag umgengni hefði meðal annars verið reist á forsendum um áframhaldandi búsetu konunnar hér á landi þar sem unnt væri að koma við reglulegri umgengni barnsins við föður sinn. Var því talið forsendur hefðu breyst svo mjög að taka þurfi málið fyrir að nýju.