Tilbúinn að skoða þann möguleika að flytja Hringrás úr Klettagörðum

Framkvæmdastjóri Hringrásar er tilbúinn að skoða þann möguleika að flytja fyrirtækið úr Klettagörðum en  undanfarna daga hafa starfsmenn fyrirtækisins unnið að öryggisúrbótum eftir brunann þar í vikunni. Hann segir að eldsvoðinn hafi komið upp meðan verið var að uppfæra dekkjatætara og því hafi óvenju mikið magn dekkja safnast upp á svæðinu.

Eftir að eldur kom upp á athafnasvæði Hringrásar í vikunni stöðvaði heilbrigðiseftirlitið möguleika fyrirtækisins á að taka við nýju efni. Dagur B. Eggertsson, borgarstjóri, hefur sagt að hann vilji fyrirtækið úr Klettagörðum og forsvarsmenn fyrirtækisins eru tilbúnir að skoða þann möguleika.

„Þá erum við alveg opin fyrir því ef það finnst hagkvæmari og heppilegri staðsetning fyrir þetta fyrirtæki. Ég er algjörlega opinn fyrir því,“ segir Kristján Ólafsson, framkvæmdastjóri Hringrásar.

Eftir að slökkvilið og heilbrigðisyfirvöld skoðuðu aðstæður á svæði Hringrásar á fimmtudag kom í ljós að fyrirtækið bryti reglur um hámark leyfilegs magns spilliefna og brotajárns á svæðinu.

Í kjölfarið var fyrirtækinu meinað að taka á móti nýjum efnum þar til bætt yrði úr ástandinu. Undanfarna daga hafa starfsmenn fyrirtækisins unnið hörðum höndum að því að grynnka á umfram efnum á svæðinu til að mæta þeim kröfum sem gerðar eru auk þess sem öryggisgæsla hefur verið efld.

„Þetta gerist á óheppilegum tíma þegar við erum að uppfæra dekkjatætarann. Hann er orðinn mun öflugri núna og þetta mun ekki vera vandamál í framtíðinni. Á meðan það var þá safnaðist upp efni og þetta gerist á óheppilegum tíma.“

Þrisvar sinnum á undanförnum tólf árum hefur allt tiltækt slökkvilið verið kallað að athafnasvæði Hringrásar vegna bruna.

Hvers vegna telurðu að þetta margir eldsvoðar hafi orðið á ykkar svæði á undanförnum árum?

„Ja, þú talar um marga eldsvoða. Það eru hvað, þrír á síðustu sjö árum, ég veit ekki hvort það á að kalla þá marga en þetta er náttúrulega bara íkveikja og þetta verður kært á mánudaginn til lögreglu.“

Kristján segist vona að viðbrögð fyrirtækisins verði til þess að fyrirtækið uppfylli kröfur um starfsleyfi.

„Við vonumst náttúrulega sannarlega til þess og við erum búin að því nú þegar þannig að þetta stendur bara á heilbrigðisyfirvöldum að koma og skoða hérna á mánudaginn og þeir sjá að það verður allt spikk og span.“