Þrír gervigrasvellir í borginni endurnýjaðir í sumar

Reykjvíkurborg mun endurnýja þrjá gervigrasvelli í sumar og verður áfram unnið að endurnýjun valla á næsta ári.

Í tilkynningu frá Reykjavíkurborg segir að borgarstjórn hafi ákveðið á fundi sínum í gær að heimila framkvæmdir við endurnýjun gervigrasvalla hjá íþróttafélögunum Fylki, KR og Víkingi.

„Sett verður nýtt gervigras á vellina með nýrri tegund af gúmmíkurli. Áætlaður kostnaður við þessar framkvæmdi er 180 milljónir króna.

Framkvæmdir eru þegar hafnar og langt komnar við lagningu nýs gervigrass á athafnasvæði  íþróttafélagins Víkings en ráðist verður í framkvæmdir á hinum völlunum í sumar.

Eftir þessar framkvæmdir hafa fimm gervigrasvellir í Reykjavík verið endurnýjaðir og eru því ekki með svokölluðu dekkjakurli auk gervigrasvallarins í Egilshöll,“ segir í tilkynningunni.