Íslensku búningarnir þrælstolnir

Sláandi líkindi eru með búningi íslenska karlalandsliðsins á EM og svo þeim sem hinir fræknu stríðsfangar, sem dvöldust fangabúðum nasista í myndinni Escape to Victory, klæddust þegar þeir öttu kappi við kvalara sína í frægum leik.

Hinir nýju íslensku búningar hafa verið nokkuð umdeildir og sitt sýnist hverjum. Um búningana hefur geisað býsna heit umræða og í umfjöllun Vísis fyrir skemmstu sagði Sindri Snær Jensson eigandi fataverslunarinnar Húrra að í hönnun hefði ýmislegt mátt betur fara.

„Það sem ég furða mig mest á er tryggðin sem KSÍ heldur við Errea. Ég hef sjálfur notið þess vafasama heiðurs að klæðast Errea æfinga- og keppnisfatnaði. Þó merkið sé ítalskt og Ítalir smekklegir með yfirburðum þá eru einfaldlega önnur merki sem standa þeim framar í útliti, gæðum og hönnun. Ég hefði viljað sjá Ísland (stórasta land í heimi) fara “All-In” með Nike eða Adidas og hanna ógleymanlega treyju sem væri svo falleg að hún seldist í bílförmum,“ sagði Sindri Snær.

Nú er sem sagt komið á daginn að hönnun búninganna er ekki úr lausu lofti gripin. Það er Erik Hirt sem hefur svona glöggt myndrænt minni og vekur athygli á þessu á sinni Facebooksíðu: „Nei sko, vissi að ég hefði séð þessa búninga áður.“

Aldrei þykja góðar tvíbökur að bísa hönnun en fátt er svo með öllu illt að ekki boði nokkuð gott. Hér er ekki leiðum að líkjast. Því í liði fanganna sem sýndu svo frækna frammistöðu í téðum leik (og hér hættum við að gera greinarmun á raunveruleika og tilbúningi myndarinnar) eru nefnilega engir aukvisar. Í markinu stóð sjálfur Sylvester Stallone og svo voru aðrar kempur á borð við Pelé, Bobby Morre og Osvaldo Ardiles – þeirra tíma hetjur. Enda, fengu nasistarnir það óþvegið á knattspyrnuvellinum.