Verja 430 milljónum í umferðaröryggi

Vegagerðin, Samgöngustofa og Ríkislögreglustjóri munu verja 430 milljónum króna til margvíslegra aðgerða á sviði umferðaröryggis á árinu.

Að ósk Ólafar Nordal innanríkisráðherra settu þessar tvær stofnanir og Ríkislögreglustjóri fram breyttar áætlanir og tillögur að verkefnum er lúta að umferðaröryggi þar sem ekki eru markaðar fjárveitingar í verkefnið á þessu ári á samgönguáætlun áranna 2013 til 2016.

Samgöngustofa mun nota átján milljónir króna í umferðaröryggisverkefni auk þess sem öðrum verkefnum, sem ekki þarfnast viðbótarfjármagns, verður haldið áfram.

Í uppfærðri áætlun er gert ráð fyrir að verja 84,5 milljónum í verkefni tengd umferðaröryggi vegfarenda. Fjármunirnir verða nýttir í sérstakt eftirlit lögreglu sem byggt er á skráningu svokallaðra svartra bletta, úrvinnslu gagna sem fást með löggæslumyndavélum, sjálfvirkt eftirlit, áróðursauglýsingar, fræðslu í grunnskólum og fræðslu fyrir erlenda ökumenn.

Vegagerðin hefur ákveðið að setja alls 385 milljónir króna af viðhaldsfé stofnunarinnar í umferðaröryggismál, þar af 27 milljónir í sjálfvirkt eftirlit og fimmtán milljónir til úrvinnslu gagna sem fást með löggæslumyndavélum.

Meðal verkefna Vegagerðarinnar samkvæmt uppfærðri áætlun er að 257 milljónum króna verði ráðstafað til margvíslegra aðgerða og úrbóta á vegakerfinu um land allt með áherslu á svartbletti og 60 milljónum varið í merkingar við einbreiðar brýr. Áætlun um einstök verkefni er í smíðum og er þeim forgangsraðað út frá slysatíðni og slysatölum um landið allt.

Ríkislögreglustjóri mun skipuleggja sérstakt umferðareftirlit fyrir 27 milljónir sem annars vegar fást með fjármögnun á umferðareftirliti lögreglustjóranna á Suðurlandi, Vesturlandi og Norðurlandi eystra og hins vegar með 12 milljónum af sérstakri fjárveitingu innanríkisráðuneytisins til eflingar lögreglu.



Fréttin birtist fyrst Fréttablaðinu 24. mars