Ráðist á mann sem vann við snjómokstur í Síðumúla

Tveir menn voru í nótt handteknir í Síðumúla grunaðir um líkamsárás. Mennirnir voru ölvaðir og höfðu ráðist á mann sem var að vinna við snjómokstur. Þeir voru vistaðir í fangageymslu en árásarþoli hugðist sjálfur á slysadeild til aðhlynningar.

Í dagbók lögreglu kemur jafnframt fram að maður í annarlegu ástandi hafi verið handtekinn við Kringluna grunaður um þjófnað skömmu fyrir klukkan sjö í gærkvöldi. „Maðurinn hafði stolið síma frá öðrum manni sem staddur var í Kringlunni. Sá elti þjófinn og hélt honum þar til lögregla kom á vettvang.  Þá kom í ljós að þjófurinn var í yfirhöfn sem hann hafði stolið og hafði aðra muni sem einnig voru þýfi.  Maðurinn var vistaður í fangageymslu lögreglu þar til hægt verður að ræða við hann.“

Lögregla hafi jafnframt afskipti af ökumönnum um miðnætti, við Skeiðarvog og í Breiðholti. Annar ökumannanna er grunaður um akstur undir áhrifum fíkniefna og vörslu fíkniefna en hinn um akstur undir áhrifum fíkniefna, nytjastuld bíls, auk þess að hafa aldrei öðlast ökuréttindi. Maðurinn var vistaður í fangageymslu.