"Flóttafólk kemur með fjölbreytta menntun og reynslu"

Það eru TENT-samtökin sem stóðu að gerð skýrslunnar er samtökin hafa það að markmiði að aðstoða flóttafólk og koma í veg fyrir að fólk sé á vergangi.

Í skýrslunni er stuðst við útreikninga frá Alþjóðagjaldeyrissjóðnum en þar kemur meðal annars fram að áætlaður kostnaður við móttöku flóttafólks muni auka skuldir aðildarríkja Evrópusambandsins um samtas 68,8 milljarða evra á árunum 2015 til 2020. Hinsvegar muni þjóðarframleiðsla sömu ríkja aukast um samtals 126,6 millarða evra á sama tímabili. Þannig muni hver evra sem varið er í móttöku flóttafólks skila sér í nærri tveggja evru ávinningi á innan við fimm árum.

Atli Viðar Thorstensen, sviðsstjóri hjálpar- og mannúðarsviðs hjá Rauða krossinum segir það algengan misskilning að flóttafólk sé byrði á samfélögum.

„Þvert á móti kemur flóttafólk oft með fjölbreytta menntun og reynslu sem skapar ákveðinn fjölbreytileika í atvinnulífi. Því er stundum haldið fram að flóttafólk komi og taki vinnu frá þeim sem fyrir eru eða leggist á kerfið en það er þvert á móti eins og þessi skýrsla staðfestir," segir Atli.

Í dag var svo birt niðurstaða könnunar sem Amnesty International lét gera á heimsvísu, þar sem 27 þúsund manns frá 27 löndum þvert á heimsálfur svöruðu.

Samkvæmt henni vilja um 80% íbúa heimsins taka á móti flóttafólki en misjafnt var þó hversu margir vildu bjóða flóttamönnum að búa hjá sér, vildu fá þá í hverfið sitt eða einfaldlega bjóða þá velkomna til að búa í landinu sínu.

Atli segir þessar niðurstöður ekki koma á óvart.

„Gott dæmi um þetta er Kæra Eygló-átakið þar sem mikill fjöldi fólks steig fram og vildi gera eitthvað fyrir flóttafólk. Þetta eru ekki tölur sem koma okkur á óvart en eru engu að síður afar ánægjulegar," segir Atli.

Kínverjar, Þjóðverjar og Bretar eru jákvæðastir gagnvart flóttamönnum á meðan Rússar, Indónesar og Tælendingar eru neikvæðastir.

Á alþjóðavísu sögðust aðeins 17% aðspurðra neita flóttamönnum inngöngu í landið sitt. Aðeins í Rússlandi sagðist 61% aðspurðra ekki hleypa flóttamönnum inn í landið.

Atli segir upplýsingar sem þessar mikilvægar.

„Stjórnvöld bæði hér og annars staðar hljóta að taka þetta til sín. Þessi svokallaða flóttamannakrísa sem er sögð vera í Evrópu er fyrst og fremst krísa flóttafólksins því það er ekki pólitískur vilji til að leysa þeirra vandamál. Ég held að þetta hljóti að hafa góð áhrif á það fólk sem á í vanda," segir Atli.