Ráðgjöf Hafró leyfir veiði á 224 hrefnum á ári

Ráðgjöf Hafrannsóknastofnunar er að árlegar veiðar á hrefnu næstu þrjú árin, 2016 til 2018, verði ekki meiri en 224 dýr á íslenska landgrunnssvæðinu, eins og segir í skýrslu stofnunarinnar um ástand nytjastofna á Íslandsmiðum 2015/2016 og aflahorfur fiskveiðiárið 2016/2017.

Ráðgjöfin er byggð á úttektum vísindanefnda Norður-Atlantshafs sjávarspendýraráðsins (NAMMCO) og Alþjóðahvalveiðiráðsins (IWC).

Hrefnuveiðar hafa undanfarin ár verið innan við helmingur af ráðlögðum hámarksfjölda. Flestar hrefnur hafa verið veiddar í Faxaflóa utan afmarkaðs hvalaskoðunarsvæðis. Árið 2015 veiddust 36 hrefnur.

Stefnt er að því að viðamikilli úttekt vísindanefndar IWC á hrefnustofnum Norður Atlantshafs ljúki árið 2016, en slíkar úttektir fara fram á sex til átta ára fresti. Árið 2017, á grundvelli þeirrar úttektar ásamt nýjum gögnum úr hvalatalningum 2015–2016, mun verða veitt ráðgjöf til lengri tíma.

Þá ráðleggur Hafró að árlegar veiðar á langreyði árin 2016 og 2017 verði ekki meiri en 146 dýr á veiðisvæðinu milli Austur-Grænlands og Íslands. Langreyði hefur fjölgað jafnt og þétt við Ísland frá upphafi hvalatalninga árið 1987 og var fjöldinn í síðustu talningu (2007) sá hæsti síðan talningar hófust.

Veiðar á langreyði hafa síðastliðin ár verið nálægt ráðlagðri hámarksveiði, að undanskildum árunum 2011 og 2012 þegar engin veiði var vegna náttúruhamfara í Japan sem er helsta útflutningslandið. Árið 2015 veiddust 155 langreyðar.

Forsvarsmenn Hvals hf., gáfu það út í vetur að skip fyrirtækisins fara ekki til veiða í sumar. Ástæðan eru aðferðir Japana við rannsóknir á kjötinu, og sagði Kristján Loftsson í viðtali við Morgunblaðið að breytist þær ekki sé hvalveiðum sjálfhætt.

Fréttin birtist fyrst í Fréttablaðinu 14. júní.