Svona vind­myllur vill ráð­herra fá sam­þykktar ofan Gils­fjarðar

Í kvöldfréttum Sýnar mátti sjá hvernig mannvirkin gætu litið út, samkvæmt kynningargögnum fyrirtæksins EM Orku. Við sögðum reyndar frá áformunum ofan Garpsdals árið 2018 þegar fulltrúar orkufyrirtækis í eigu Dana og Íra kynntu heimamönnum verkefnið.

Áformin gera núna ráð fyrir að 21 vindmylla rísi þarna á fjöllunum. Mest áberandi yrðu þær frá þjóðveginum yfir Þröskulda. Frá Ólafsdal rétt sæist í toppinn á þeim þótt þær verði 160 metra háar. Hver vindmylla gæti framleitt 4,2 megavött sem gæfi 88 megavatta heildarframleiðslugetu.

Landsmenn hafa núna frest í samráðsgátt til 29. september næstkomandi til að lýsa skoðun sinni á þeim áformum ráðherrans Jóhanns Páls Jóhannssonar að setja vindmyllurnar í Garpsdal í nýtingarflokk rammaáætlunar.

Ráðherrann segir mestar áhyggjur af því að farleiðir hafarna gætu í einhverjum tilvikum legið nálægt vindmyllunum. Hann segist leggja áherslu á að gætt verði varúðar í þeim efnum og hugað verði að mótvægisaðgerðum.

Þessi virkjunarkostur hafi hins vegar ákveðna sérstöðu, að mati ráðherrans; verðmætagildi náttúru- og menningarminja á svæðinu sé lægra en annarra kosta og hann komi einna best út í mati á samfélagslegum áhrifum. Þá virðist meiri sátt ríkja um hann í nærsamfélaginu heldur en gildi um aðra kosti.

Og það var einmitt það sem við heyrðum þegar við ræddum við bændurna í Garpsdal og þáverandi oddvita Reykhólasveitar haustið 2018. Þar fögnuðu menn því að fá fleiri störf í sveitina, umtalsverð fasteignagjöld og orkuöryggi.

Hér má heyra hvað heimamenn sögðu fyrir sjö árum:

Samkvæmt upplýsingum EM Orku er áætlað að fjárfestingin nemi nítján milljörðum króna, hún skapi tvöhundruð störf á byggingartíma og átján störf til langs tíma.

Ríkarður Örn Ragnarsson, verkefnastjóri EM Orku ehf., segir að þegar grænt ljós fæst á verkefnið gæti það komist á framkvæmdarstig eftir eitt ár. Reiknað sé með að framkvæmdir standi yfir í tvö ár.