Pressa á afgreiðslu húsnæðismála

Alþingi kemur aftur saman í dag eftir jólafrí. Ef þingið nær að halda dagskrá sinni mun það starfa fram til þriðjudagsins 31. maí.

Lítill hluti þingmála var afgreiddur á síðasta þingi og því ljóst að mikil vinna er fyrir stafni á Alþingi. Þau mál sem helst hefur borið á góma nú fyrir fyrstu þingviku eru húsnæðisfrumvörp velferðarráðherra og tillögur stjórnarskrárnefndar sem áttu að skila sér fyrir fyrsta þingfund en hafa ekki gert.

Ásmundur Einar Daðason, þingflokksformaður Framsóknarflokksins, segir að húsnæðisfrumvörpin séu fyrstu stóru málin sem komi til kasta Alþingis eftir jólafrí. Þá hafa efasemdir verið á lofti meðal margra sjálfstæðismanna vegna húsnæðismálanna. 

Nokkur pressa er á afgreiðslu húsnæðisfrumvarpanna en þau eru hluti af yfirlýsingum stjórnvalda í tengslum við kjarasamninga síðasta árs og meðal forsendu þess að kjarasamningar opnist ekki enn á ný. Endurskoðun þeirra er í gangi fram í febrúar.

„Þetta er mál sem er hluti af stefnu ríkisstjórnarinnar og hluti af yfirlýsingum vegna kjarasamninga. Þetta er komið í gegn um ríkisstjórn og í gegn um stjórnarflokkana þannig að ég hef engar áhyggjur af öðru en að það sigli í höfn,“ segir Ásmundur og bendir á að það sé mikill stuðningur við húsnæðismálin á þingi og að þau séu gríðarmikilvæg fyrir ungt fólk.

Þá nefnir Ásmundur vinnu stjórnarskrárnefndar. „Þar leggjum við framsóknarmenn gríðarlega áherslu á beint lýðræði og að koma auðlindaákvæði um sameign þjóðarinnar á auðlindum inn í stjórnarskrá,“ segir hann.

Ragnheiður Ríkharðsdóttir, þingflokksformaður Sjálfstæðisflokksins, segir þingflokk Sjálfstæðisflokksins hafa ýmsar athugasemdir vegna húsnæðisfrumvarpa velferðarráðherra.

„Þetta er kannski ekki beintengt því sem við stöndum fyrir sem er séreignarstefnan og að auðvelda fólki að eignast þak yfir höfuðið,“ segir Ragnheiður.

Ragnheiður segir sjálfstæðismenn styðja starf stjórnarskrárnefndar.

„Við höfum tekið af heilum hug að skoða þau atriði sem eru til skoðunar. Og ég bind miklar vonir við að þessari nefnd takist að ljúka sinni vinnu þrátt fyrir að hún hafi ekki náð að klára fyrir 18. janúar,“ segir hún.

Helgi Hjörvar, þingflokksformaður Samfylkingarinnar, segir flokk sinn leggja áherslu á húsnæðismál ungs fólks. Hann segir margt jákvætt í frumvörpum velferðarráðherra en þau gangi ekki nægilega langt og ágreiningur innan ríkisstjórnarinnar sé áhyggjuefni.

Hvað breytingar á stjórnarskrá varðar segir Helgi þingið vera að falla á tíma.

„Stjórnarskrárnefnd hefur ekki komist að neinni niðurstöðu og eftir að stjórnarflokkarnir treystu sér ekki í þjóðaratkvæðagreiðslu samhliða forsetakosningum þá dregur það úr líkunum á að eitthvað komi út úr því með hverjum deginum sem líður.“