Veislusalur Björgólfs við Fríkirkjuveg veldur nágrönnum áhyggjum

Eigendur Laufásvegar 24 segjast ósáttir við breytta notkun á Fríkirkjuvegi 11 og kvarta undan ónæði og skemmdum vegna framkvæmda.

„Í mjög smáu letri segir að gert sé ráð fyrir að 155 manns að hámarki geti setið og snætt í samkomusal, borðsal og bar á fyrstu hæð hússins. Við viljum benda á að þau þrjú bílastæði og eitt fyrir hreyfihamlaða sem gert er ráð fyrir á Fríkirkjuvegi 11 geta með engu móti uppfyllt þörfina fyrir bílastæði þó aðeins helmingur af þessum fjölda væri samankomin á Fríkirkjuvegi 11 á sama tíma,“ segir í bréfi íbúa og eigenda Laufásvegar 24 til skipulagsyfirvalda í Reykjavík.

Fríkirkjuvegur 11 er í eigu Novators, félags Björgólfs Thors Björgólfssonar, sem keypti húsið af Reykjavíkurborg fyrir hrun og hefur verið að gera á því breytingar.

Fólkið á Laufásvegi 24, sem er ofan við Fríkirkjuveg 11, kveður framkvæmdir við síðarnefnda húsið hafa neikvæð áhrif á eign þeirra og þægindi íbúanna. „Ennfremur erum við ekki sátt við að borgin leyfi svona stórkostlegar breytingar á notkun hússins án þess að fara í meiri kynningar fyrir íbúa á svæðinu,“ segir í bréfi þeirra.

Þá er rakið að þrettán bílastæði séu framan við Laufásveg 25-27. Margir keppi um þessi stæði; starfsmenn bandaríska sendiráðsins, skólanemar og í framtíðinni gestir Fríkirkjuvegar 11.

„Borgin verður að gæta þess að mismuna ekki íbúum sínum. Laufásvegur var skipulagður sem íbúðarsvæði, en borgin leyfir meiri og meiri notkun á svæðinu sem aðeins getur flokkast undir opinbert svæði. Nú í næstum tvö ár hafa þessi bílastæði oft verið óaðgengileg vegna mikilla framkvæmda á Fríkirkjuvegi 11. Hvorki borgin né framkvæmdaaðili gerðu íbúum grein fyrir hvað í vændum væri.“

Í umsögn um athugasemdir bréfritaranna segir embætti skipulagsfulltrúa að í samþykktri byggingarleyfisumsókn eiganda Fríkirkjuvegar 11 komi fram að sótt verði um tækifærisleyfi fyrir hverja notkun veislu og ráðstefnusala. 

„Og því er ekki um stöðuga notkun að ræða. Engar breytingar eru gerðar á fjölda bílastæða í nýrri byggingarleyfisumsókn,“ segir í umsögninni. Því er hafnað að málið hafi ekki verið nógu vel kynnt og lagt til að byggingarleyfið verði samþykkt. Sem skipulagsráð borgarinnar gerði. 

Vegna framkvæmdanna við Fríkirkjuveg 11 hefur stórum bílum verið ekið niður þröngt sund ofan af Laufásvegi framhjá húsi númer 24. Steinveggur sem þar var skemmdist er vörubíll bakkaði þar niður og féll á jeppa í innkeyrslunni. 

„Steinveggurinn var síðan tekin í burtu af framkvæmdaraðilum en ekkert samband haft við eigendur eða íbúa á Laufásvegi 24. Framkvæmdir á Fríkirkjuvegi 11 hafa ollið okkur ónæði og áreiti, mikill hávaði og umferð stórra ökutækja. Sífellt verið að bakka niður aðreinina með stórum ökutækjum, aðrein sem er í raun aðeins fyrir fótgangandi,“ segja eigendur Laufásvegar 24 sem frábiðja sér frekara ónæði og ágengi. „Við viljum að að þessi veggur verði endurbyggður í sinni upprunalegu mynd alveg að gangstétt.“ 

Undir þetta tekur skipulagsfulltrúi. Steinveggurinn sé friðaður vegna aldur og hann eigi að lagfæra og endurgera og færa inn á lóðaruppdrætti.

Fréttin birtist fyrst í Fréttablaðinu