Framleiða 10 til 12 milljónir lítra af gosi fyrir hátíðarnar

Gosneysla Íslendinga um jólahátíðina verður svipuð og á síðasta ári. Þetta er mat framleiðenda sem segja þó að neyslumynstrið breytist á þessum tíma.

Fréttastofan greindi frá því um síðast liðnu helgi að í skýrslu Rannsóknarseturs verslunarinnar kæmi fram að vaxandi hagvöxtur og aukin einkaneysla gefi  vísbendingu um að velta smásöluverslunar nái nýjum hæðum um jólin. Á það bæði við um dagvöru og sérvöru og Rannsóknarsetrið ætlar að landinn eigi eftir að gera vel við sig í mat og drykk yfir hátíðarnar.

Okkur lék þá forvitni á að vita til dæmis hversu mikið gos verður framleitt hjá tveimur stærstu gosframleiðendum landsins. Í lauslegri athugun fréttastofunnar kom í ljós að framleiddir verða á bilinu 10-12 milljón lítrar af gosi.

„Hún er svipuð eins og í fyrra en hún hefur aukist samhliða auknum fólks fjölda á landinu, en já annars er hún svipuð,“ sagði Margrét Arnardóttir, framkvæmdastjóri tæknisviðs Ölgerðarinnar.

 

„Okkar svona eftirspurnarspár sem við gerum mánaðarlega gera ráð fyrir að þetta sé svipað magn en jólin eru talsvert örðuvísi í ár en til dæmis í fyrra. Við erum með langa helgi. Það eru fáir frídagar þannig að það er í rauninni dálítið erfitt að spá fyrir um þetta,“ segir Stefán Magnússon, markaðs- og kynningarstjóri hjá Coca Cola á Íslandi.

Margrét og Stefán segja bæði að neyslumynstur Íslendinga á gosi breytist yfir jólahátíðina.

„Helst bara í maltinu og appelsíninu. Það eru auðvitað okkar vinsælustu drykkir um jólin og það eru engin jól á Íslandi án þess að allir fái sér malt og appelsín,“ segir Margrét.

 

„Fólk er meira að kaupa klassísku gömlu glerflöskuna og svo er alltaf stór flaska kannski á borðinu til þess að hella í glös, þannig að það er svona kannski aðeins meira af gosi og minna af vatni,“ segir Stefán.

Ölgerðin fékk sterk viðbrögð við því í morgun þegar það spurðist út að vegna rafmagnsbilunar gæti fyrirtækið ekki annað eftirspurn á gosdrykkjum fyrir jólin en í dag komst fyrirtækið í veg fyrir bilunina.

„Fólk var strax byrjað að spyrja hvort það þyrfti að hamstra og svoleiðis. Við vinnum allan sólarhringinn núna. Fólk er búið að vera mjög hörðum höndum við að koma framleiðslunni á réttan stað aftur,“ segir Margrét.

 

Ef þetta kæmi fyrir aftur hjá Ölgerðinni. Mynduð þið hjálpa þeim?

 

„Við vonum bara að þeir leysi sín mál,“ segir Stefán.