Dominos hætt við að nota hreindýr sem pítsusendla: „Of erfitt að hafa stjórn á þeim“

Pítsurisinn Domino's hefur ákveðið að hætta við að nota hreindýr sem pítsusendla yfir jólavertíðina. Of erfitt reyndist að hafa stjórn á hreindýrunum.

Stefnt var að því að hreindýrin myndu starfa í Japan og var unnið hörðum höndum að því að þjálfa þau fyrir verkefnið.

Hreindýrin áttu að draga á eftir sér sleða og á sleðunum átti að vera GPS staðsetningartæki þannig að svangir gætu fylgst með pöntuninni koma upp að dyrum í rauntíma.

Í tilkynningu frá Domino's segir að það hafi verið „of erfitt að hafa stjórn á þeim“ og því hafi verið ákveðið að hætta við verkefnið. Domino's lagði talsverða vinnu í verkið og gerði meðal annars myndbandið sem sjá má hér að að neðan þar sem farið er yfir þjálfunina á hreindýrunum.