Edda Björg og Stefán selja stór­glæsi­lega íbúð sína í mið­borginni

Leikkonan Edda Björg Eyjólfsdóttir og tónlistarmaðurinn Stefán Már Magnússon hafa sett íbúð sína við Miðstræti á söluskrá og er kaupverðið tæplega 74 milljónir.

Eignin er um 120 fermetrar að stærð og í húsi sem byggt var árið 1907. Fasteignamat eignarinnar er 41,5 milljónir en íbúðin er staðsett á besta stað í borginni og skemmir ekki útsýnið yfir Reykjavíkurtjörn.

Um er að ræða einstaklega falleg og sjarmerandi sex herbergja íbúð í einu af eldri húsum borgarinnar. Íbúðin er á þriðja hæð og eins og áður segir er glæsilegt útsýni yfir mið- og vesturbæinn. Á hæðinni eru þrjú svefnherbergi, fataherbergi, tvær stofur, eldhús og nýuppgert rúmgott baðherbergi. Risloft er yfir öllu sem gefur mikla möguleika.

Edda Björg var á sínum tíma til umfjöllunar í þættinum Heimsókn á Stöð 2 en þá heimsótti Sindri Sindrason hana og fékk að sjá inn í íbúðina en hér að neðan má sjá þáttinn í heild sinni, sem og myndir innan úr eigninni.