Myndband náðist af því þegar Bieber kýldi aðdáanda

Kanadíska ofurstjarnan Justin Bieber kýldi aðdáenda þegar sá reyndi að komast í snertingu við Bieber í Barcelona í gærkvöldi.

Bieber var á leið á Palau Sant Jordi-völlinn þar sem hann hélt tónleika síðar um kvöldið þegar atvikið átti sér stað. Bieber kýldi aðdáandann út um opinn glugga á svartri glæsikerru sem var á ferð þegar aðdáandinn reyndi að snerta Íslandsvininn.

Þar sem margir farsímar voru á lofti náðist myndband af atvikinu sem Daily Mail birtir og má sjá hvernig blæðir úr munni aðdáandans eftir högg Bieber.

Bieber var nýbúinn að opna gluggann til að veifa til aðdáendanna þegar maðurinn hljóp að bílnum og fékk hnefahögg í andlitið.

Sjá má myndbandið að neðan.

Mikið hefur gengið á á tónleikaferðalagi Bieber að undanförnu, en nýverið yfirgaf hann sviðið á tónleikastað í Manchester í Bretlandi eftir að hafa ekki fengið þær móttökur sem hann hafði vonast eftir. Þá yfirgaf hann sviðið í Chatau Neuf í Noregi í október eftir einungis eitt lag.