Björgunarsveitarmenn slösuðust við leit

Tveir björgunarsveitarmenn slösuðust þegar þeir tóku þátt í leit að manni á Vatnsnesi, norðan við Hvammstanga í gærkvöldi. Þegar mannsins var saknað voru björgunarsveitir kallaðar út og laust fyrir klukkan níu í gærkvöldi var óskað eftir þyrlu Landhelgisgæslunnar til leitarinnar.

Þegar hún var komin á svæðið fannst maðurinn, sem var fluttur á heilsugæslustöð til aðhlynningar, en þyrlan tók björgunarsveitarmennina um borð og flutti þá á slysadeild Landspítalans í Reykjavík. Fréttastofunni er ekki nánar kunnugt um meiðsl þeirra.