Vanir slökkvistarfi á athafnasvæðinu og gekk greiðlega að slökkva eldinn

Slökkvilið höfuðborgarsvæðisins sendi allt tiltækt lið í Klettagarða í kvöld eftir að tilkynning barst um eld í safnhaugi á iðnaðarsvæði Hringrásar. Samkvæmt upplýsingum frá slökkviliðinu reyndist eldurinn ekki mikill og gekk greiðlega að ná tökum á honum. Safnhauginum hefur verið skipt niður og því var eldurinn minni en annars.

Ástæða þess að slökkvistarf gekk vonum framar er að slökkviliðsmönnum tókst að kæla hauginn vel. Þar sem oft hefur kviknað í á iðnaðarsvæðinu vissu slökkviliðsmenn hvernig og hvaðan væri best að ráðast á eldinn.

Mikill reykur var yfir svæðinu og fylgdi honum mikil lykt sem barst í Laugarneshverfið. Um var að ræða blandaðan safnhaug, en Hringrás tekur á móti og endurvinnur brotajárn, hjólbarða og ýmis spilliefni. Starfsfólk frá Hringrás vann í því að moka hauginn til svo slökkviliðið gæti slökkt í jafn óðum.

Þetta er ekki í fyrsta sinn sem eldur kemur upp á athafnasvæði Hringrásar við Sundahöfn. Kviknaði í safnhaugum þar árið 2004, svo rýma þurfti fjölda húsa. Árið 2011 kviknaði svo aftur í safnhaugum á athafnasvæðinu.

Ekki er talin þörf á því að vera með vakt á svæðinu í nótt.