Vísindabók Villa í víking

Fyrsta bók Vilhelms Antons Jónssonar, Vísindabók Villa, verður gefin út í Bandaríkjunum í janúar. Forlagið Edda USA, gefur bókina út og segir Vilhelm vera spenntur að sjá hvernig börn þar í landi muni taka vísindafróðleik og tilraunum sínum. „Ég er mjög spenntur að sjá hvað gerist og finnst það mikill heiður að einhver vilji standa í því að þýða litlu bókina mína yfir til hinnar stóru Bandaríkja,“ segir hann.

Bandaríska útgáfan mun vera með færri blaðsíður og í öðruvísi broti. „Ég þarf að suða út ferð til Bandaríkjanna því það er auðvitað ótækt að ég verði ekki á staðnum. Forlagið hlýtur að leigja eitthvert ægilega stórt náttúrugripasafn fyrir útgáfupartíið, það dugar ekkert minna,“ segir hann og hlær.

Fjórða bókin í Vísindabókaflokki hans kom út fyrir skömmu og heitir Skynjun og skynvillur en þar fjallar hann um hvað sé auðvelt að plata heilann.

„Skynvillur eru skemmtilegar en stundum er ekkert vitað af hverju við sjáum sumt vitlaust. En við vitum að ef þetta gabbar okkur ekki þá er eitthvað að. Þá þarf að skoða í kollinn.

Þetta er yndislegt ferli að skrifa svona bækur og býr til forvitni fyrir krakka sem er dýrmætasta tilfinning í heimi.“

Vilhelm ætlar að setja Vísinda-Villa á svið en hann og Vignir Rafn Valþórsson eru búnir að skrifa verk sem Vignir leikstýrir og Vilhelm og Kristín Vala, úr Þeim tveim, leika í. „Sú sýning mun byrja á rafmagnsgítar. Það er það eina sem ég get sagt. Það var það fyrsta sem ég skrifaði. Það er ekki hægt að sleppa krökkum út í lífið nema að útskýra að rafmagnsgítar er flottasta hljóðfæri sem hefur verið búið til. Um það er ekki deilt,“ segir Vilhelm.

Sýningin verður sett upp í Borgarleikhúsinu og er stefnt að frumsýningu í byrjun febrúar.