101 boys leikstýra söngleik í MR

Þeir Sigurbjartur Sturla Atlason og Jóhann Kristófer Stefánsson leikstýra söngleiknum High School Musical í MR. Logi Pedro Stefánsson sér um að semja og útsetja tónlistina og því má segja að það sé ákveðin Sturlu Atlas-stemming ríkjandi í söngleiknum.

„Við Jói kláruðum skólann og þá lá beinast við að fara í svona verkefni, við erum að leggja grundvöll að því að gera eitthvað stærra í leikhúsinu. Við fórum í viðræður við MR og þau samþykktu að fá okkur til að leikstýra,“ segir Sigurbjartur Sturla Atlason, annar af tveimur leikstjórum söngleiksins High School Musical sem nú er til sýninga í MR. Hann leikstýrir verkinu ásamt Jóhanni Kristófer Stefánssyni en þeir eru báðir nýútskrifaðir úr Listaháskóla Íslands. Um tónlistina sér Logi Pedro Stefánsson, en þeir þrír eru einnig mennirnir bak við fjöllistahópinn 101 boys og Sigurbjartur er kannski þekktari sem Sturla Atlas.

„Við ákváðum strax að við ætluðum að gera High School Musical – en á sama tíma var það alveg ljóst að við myndum ekki bara gera „basic“ High School Musical söngleik, þannig að við byrjum að plotta hvernig við gætum gert þetta og ákváðum að staðfæra allan söngleikinn yfir á MR, þannig að þetta er í raun Herranótt Musical eða MR Musical.

Síðan fórum við inn í þetta ferli – ég hef gert alveg slatta af því að vera leikaramegin í að gera leiksýningu og Jói hefur gert það líka í skólanum, en þetta er samt í fyrsta skipti sem við höfum stjórnað svona hóp og það er auðvitað alveg ruglað dæmi – það kom okkur báðum mjög mikið á óvart. Við Jói erum sammála um að þróunin á sýningunni hafi verið frekar feit og að sýningin sé bara alveg rugluð.“

Hvernig er tónlistin, er þetta frumsamið efni eða nýttuð þið lögin úr myndinni?

„Logi Pedro sér um tónlistina í þessu. Hann endurútsetti fjögur lög úr High School Musical og síðan er eitt frumsamið. Síðan ofan á það er hljóðheimur sem við Jói bjuggum til á æfingum. Besta leiðin til að lýsa þessu er kannski sú að enginn af okkur, hvorki ég, Jóhann né Logi, hefur áhuga á að gera eitthvað sem gæti talist hefðbundið eða eitthvað sem hefur sést áður í leikhúsinu, þannig að ég get lofað því að þetta er mjög ferskt.

Þetta eru bara lög sem eru samin fyrir þessa mynd. Þessi lög urðu öll hörku vinsæl – eins og Breaking Free sem er í mynd númer eitt – það náði alveg í fjórða sæti á Billboard-listanum.

Það sem er líka gaman er að við Jói erum báðir fæddir ’92, þannig að þegar þessar myndir komu út vorum við unglingar og þá vorum við ekki að fara að tékka á þessu, þetta var of leim. Krakkarnir sem við erum að leikstýra eru sirka fimm árum yngri og þau þekkja þetta miklu betur en við,“ segir Sigurbjartur en sýningin er sýnd í Gaflaraleikhúsinu og það eru aðeins tvær sýningar eftir – sunnudaginn 20. og miðvikudaginn 23. nóvember. Hægt er að næla sér í miða á midi.is.