Ekki fara af hótelinu og ekki fá mat upp á herbergi

Forráðamenn NFL-liðsins Houston Texans hafa augljóslega miklar áhyggjur af því að öryggi leikmanna liðsins verði stefnt í hættu í Mexíkó.

Á mánudaginn mun Texans spila við Oakland Raiders í fyrsta leik deildarinnar í Mexíkó en leikurinn fer fram í Mexíkó City.

Leikmenn Texans hafa fengið skýrar leiðbeiningar um hvernig þeir eigi að haga sér á meðan þeir eru í landinu.

Þeim er bannað að fara út af hótelinu og þeim er líka skipað að borða aðeins í matsal hótelsins þar sem kokkar Texans sjá um eldamennskuna. Þeir mega ekki panta mat upp á herbergi.

Þeir eiga að skilja alla skartgripi eftir heima, ekki koma með mikinn pening með sér, ekki nota hraðbanka og aðeins drekka vatn af sérmerktum flöskum.