„Salbjörg vill búa við mannlega reisn og sitt sjálfstæði“

Ung fötluð kona neyðist til að flytja á sambýli þrátt fyrir einlægan vilja hennar til að búa í eigin íbúð. Faðir hennar bendir á að kostnaður borgarinnar fyrir pláss á sambýli sé sambærilegur og kostnaður við að hún fái persónulega aðstoð í eigin íbúð.

Forsaga málsins er að Salbjörg stefndi Reykjavíkurborg því hún fær aðeins aðstoð aðra hverja viku til að geta búið sjálf í eigin íbúð. Hinar vikurnar þarf hún því að fara í skammtímavistun.

Sjá einnig: Lögsækir borgina vegna brota á réttindum dótturinnar

Salbjörg tapaði málinu með þeim rökstuðningi að regluverk borgarinnar leyfi ekki hærri greiðslur til Salbjargar svo hún geti ráðið aðstoðarfólk alladaga ársins. En Salbjörg er einhverf og með aðrar undirliggjandi fatlanir sem veldur því að vikulegir flutningar eru beinlínis heilsuspillandi fyrir hana.

Því neyðist hún til að flytja alfarið á sambýli ef hæstiréttur staðfestir dóminn.

„Ég ætla ekki að tala illa um þann stað sem er búið að bjóða Salbjörgu. En varðandi hana persónulega og prívat þá þarf hún heilmikla nánd. Hún hefur kynnst því að búa í sinni eigin íbúð og velja sér fólk til að þjónusta hana,” segir Atli Lýðsson, faðir Salbjargar og að sambýli henti engan veginn Salbjörgu en fjölskyldan fór að skoða nýju vistaverurnar á dögunum.

„Við fórum einn hring og Salbjörg vildi gjarnan flýta sér út.  Hún hefur ekkert minnst á þetta síðan eða viljað um þetta tala. Hún segir bara heim og vill vera heima þegar við ræðum þessi mál við hana. Þetta er heimili hennar í hennar huga og það finnst okkur vera sterk skilaboð frá henni." 

Ilmur Kristjánsdóttir, formaður velferðarráðs, segist ekki geta tjáð sig um einstök mál. En í gær skrifaði hún í svari til Atla á Facebook að ríkur vilji sé til að leysa málið en lögfesta þurfi NPA til að Salbjörg geti búið heima. 

NPA er þjónusta sem er sérsniðin að þörfum hvers og eins. Hún skrifar að það væri mjög hjálplegt ef allir legðust á eitt að þrýsta á Alþingi að lögfesta NPA til að sveitarfélögin geti fjármagnað þjónustuna. 

„Okkur finnast þetta ekki gild rök. Salbjörg vill búa við mannlega reisn og sitt sjálfstæði á þeim stað sem hún vill búa. Ef borgin getur gert það fyrir sama pening og kostar að vista hana á stofnun þá eru þetta engin rök í málinu, ekki í okkar huga.”